Gəncənin icra başçısı şəhid dəfnində qaydaları niyə pozdu? – VİDEO+Fotolar

Ötən gün Gəncə Şəhidlər Xiyabanında baş tutan şəhid dəfninin təşkili icra başçısı Niyazi Bayramovun nə qədər təkəbbürlü, təlimat və göstərişlərə nə dərəcədə laqeyid biri olduğunu növbəti dəfə sübut edib. İcra başçısının mərasimə gəlişindən və şəhid cənazəsini qarşılama törənindən tutmuş, şəhidin tabutunu bəzəyən üçrəngli dövlət bayrağımızın dəfndən xeyli əvvəl tez-tələsik sökülməsi və rəsmi şəxslərin müşaiyətilə Niyazi Bayramovun xiyabanı tərk etməsi təəssüf doğurub. Lakin bu da nöqsan adına son deyil...
"Demokratik.Az"-ın məlumatına görə, fevralın 23-də Gəncədə uşaqlar evində böyüyən, ikinci vətən müharibəsində itkin düşmüş və nəşi yeni tapılan mərhumun - şəhid Əmrah Rəcəbovun dəfnində diqqəti çəkən daha mühüm məqamlardan biri də şəhidə hərbi ehtiramın düzgün təşkil edilməməsi olub.
Mərasimdə çəkilən foto və videomateriallardan da aydın olur ki, Nazirlər Kabinetinin “Azərbaycan Respublikasının həlak olmuş vətəndaşlarına hərbi ehtiram göstərilməsi ilə bağlı təqdiqlədiyi mövcud qaydalar nəzərə alınmayıb. Qaydaya görə,
SİTAT: "cənazə məzara qoyulmamışdan əvvəl Azərbaycan Respublikasının Dövlət bayrağı fəxri qarovulun rəisi tərəfindən götürülür, fəxri qarovul üzvlərinin iştirakı ilə, aypara və səkkizguşəli ulduz təsviri yuxarıda olmaqla, düzbucaqlı üçbucaq şəklində qatlanılır. Dəfn mərasiminin yekununda dəfn komissiyasının rəhbəri, komissiya yaradılmadıqda isə fəxri qarovulun rəisi Azərbaycan Respublikasının Dövlət bayrağını mərhumun ailə üzvlərindən birinə təqdim edir".
Dəfn zamanı şəhidin hərbçilərin müşaiyyətilə deyil, məhz icra başçısı və könüllü dindarlar tərəfindən son mənzilə yola salınması Səfərbərlik və Hərbi Xidmətə Çağırış Üzrə Dövlət Xidmətinin Gəncə şəhər şöbələrinin, xüsusilə Müdafiə Nazirliyinin də atasız-anasız böyümüş bir şəhidimizə qarşı laqeyidliyini ortaya qoyur. Və aydın olur ki, icra başçısı ali baş komandanın səlahiyyətli nümayəndəsi olaraq bu həssas məsələyə münasibətdə də yerində olmayan bir kadrdır.
Əslində "44 günlük vətən savaşı" boyunca Gəncə Şəhidlər Xiyabanında təşkil edilən şəhid dəfn mərasimlərinin heç də hamısı sonuncu qədər uğursuz olmayıb. Nədənsə bu dəfə icra başçısı Niyazi Bayramov dəfnə 5-10 dəqiqə zaman ayırıb və komanda üzvlərinin təşkilatçılığı ilə şəhidin tabutunu cənazə namazı qılmaq üçün Xiyabanın girişində qarşılayıb.
Yəni, məmurlar xiyabana şəhidin arxasınca daxil olmayıb, şəhidin cənazəsini gətirib onların hüzuruna qoyublar. Bundan dəqiqələr sonra da bayraq tabutdan sökülüb və bayraq şəhid yaxınına (tərbiyyəçi müəllimə-red) məlum səbəbdən dəfndən öncə verilib. Bunlar da bəh-bəhlə çəkilərək ictimaiyyətə formal xarakterli, normal mərasim kontekstində təqdim edilib.
Bayraqsız tabut məzara məmurların müşaiyəti olmadan, inanclı şəxslər tərəfindən "Ya Hüseyn!" sədaları altında daşınıb.
Mərasimin rəsmi hissəsinin də yalnız molla-axundun ümidinə qalması üzücüdür. Rəsmi şəxslərdən kimsə nitq söyləməyib.
Məlumat üçün mərhum şəhid Əmrah Rəcəbov barədə bioqrafik məlumatı da (wikipediyaya istinadən) diqqətinizə çatdırırıq:
Əmrah Rəcəbov 11 dekabr 2000-ci ildə Azərbaycan Respublikasının Gəncə şəhərində anadan olmuşdur. Kiçik yaşlarında atasını itirmişdir. Anası tərəfindən Gəncə şəhərində yerləşən internat tipli məktəbə verilmişdir.
Orta təhsilini Gəncə şəhər Samir Vəliyev adına 34 nömrəli tam orta məktəbində alır. Gəncə İnternat məktəbindən məzun olduqdan sonra, dövlət tərəfindən Masazır məzunlar evindən ev hədiyyə olunur. 2019-cu ilin oktyabr ayında Azərbaycan Silahlı Qüvvələrinin sıralarında həqiqi hərbi xidmət keçmək üçün orduya çağrılmışdır.
Xidməti fəaliyyətini Beyləqan rayonunu N saylı hərbi hissəsində icra etmişdir. 2020-ci ilin 27 sentyabr tarixində İkinci Qarabağ müharibəsinin başlmasından sonra Füzuli əməliyyatına cəlb olunmuş və Füzuli rayon mərkəzinin azad edilməsi uğrunda aparılan şiddətli döyüşlərdə iştirak etmişdir.
Əmrah Rəcəbov 2020-ci ilin 8 oktyabr tarixində Füzuli əməliyyatının gedişatında yaralanmış əsgər yoldaşını, döyüş mövqeyindən çıxartmağa çalışarkən yaxınlığına düşən mərmi nəticəsində şəhid olmuşdur. Uzun müddət itkin olaraq axtarılan Əmrah Rəcəbovun nəşi 23 fevral 2021-ci ildə tapılmış və Gəncə Şəhidlər Xiyabanında torpağa tapşırılmışdır.
ALLAH şəhid Əmrah Rəcəbovun timsalında BÜTÜN ŞƏHİDLƏRİMİZƏ RƏHMƏT ETSİN!
Osman Nərimanoğlu
Demokratik.Az