Çovdarov 12 il "iş" aldı

Sabunçu Rayon Məhləməsində ləğv edilmiş MTN-in generalı Akif Çovdarov və digər 3 nəfərin cinayət işi üzrə məhkəmə prosesi keçirilib. Gözlənilən baş verib və sabiq MTN generalına iş oxunub.

Demokratik.Az bildirir ki, bir müddətdir hakim Həbib Həsənovun sədrliyi ilə keçirilən prosesdə general A.Çovdarova və digərlərinə hökm oxunacağı gözlənilirdi.

Məhkəmənin hökmü ilə Akif Çovdarov 12 il müddətində azadlıqdan məhrum edilib.

Hökmə əsasən Səlim Məmmədov isə, 11 il müddətinə azadlıqdan məhrum olunub.

Hökmün davamında Akif Əliyevin və Orxan Osmanovun da cəzaları elan edilib. A.Əliyev 5 il, O.Osmanov isə 4 il müddətinə azadlıqdan məhrum ediliblər.

Xatırladaq ki, prokuror Akif Çovdarova cəza istəyib. Dövlət ittihamçısı A.Çovdarovun 15 il müddətinə azadlıqdan məhrum edilməsini istəyib. Prokuror Səlim Məmmədovun 12 il, Akif Əliyevlə Orxan Osmanovun isə 9 il müddətinə azadlıqdan məhrum edilməsini tələb edib. Təqsirləndirilən şəxslərin hamısı son sözlə çıxış edərək, onlara qarşı irəli sürülmüş ittihamla özlərini təqsirli bilmədiklərini deyiblər.

Qeyd edək ki, Akif Çovdarovla birlikdə müttəhimlər kürsüsünə ləğv edilmiş MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanov da çıxarılıblar.