“ADAU – Gərək gələsən, öz gözlərinlə görəsən…” Tanınmış təhsil eksperti açıqladı

Demək olar ki, universitetlərimizin böyük əksəriyyətində olmuşam, müsbətini, mənfisini görmüşəm, bu ali təhsil müəssisələrinin yaxın keçmişi və bu günü ilə müqayisəsinin fərqindiyəm. Ölkə başçısının Sərəncamı ilə təsdiq olunmuş "İctimai iştirakçılıq haqqında” Qanunun müddəa və tələblərinə, bununla bağlı Təhsil Nazirinin müvafiq əmrinə əsasən sessiya imtahanlarında obyektivliyin və şəffaflığın təmin olunmasında nəzarət qrupunun üzvü kimi təhsil eksperti qismində bir çox ali məktəblərdə müşahidəçi olaraq iştirak etmiş, universitetlərimizin maddi-texniki bazasının möhkəmləndirilməsi, infrastrukturlarının müasir beynəlxalq standartlara uyğunlaşdırılması, kadr potensialının gücləndirilməsi, aşkarlıq və şəffaflığın təmin olunması sahəsində aparılan yeni sosial- iqtisadi paradiqma olan davamlı inkişafın bilavasitə şahidiyəm. Xoş təəssuratlarım yetərincədir.

Belə təəssüratlarımdan biri və ən təsirlisi bir təhsil mütəxəssisi kimi dahi Azərbaycan şairi və mütəfəkkiri Nizami Gəncəvinin yurdunda 1929 –cu ildən fəaliyyət göstərən, "aqronomluq”, "aqrar iqtisadiyyat”, "aqrobiznes və idarəetmə”, "aqrotexnologiya”, "baytarlıq təbabəti və zoomühəndislik”, "mühəndislik” fakultələrini, qiyabi təhsil şöbəsini və maqistr hazırlığı şöbəsini özündə birləşdirməklə, ölkəmizin müxtəlif bölgələrindən 5000 mindən çox tələbə gənclərə azərbaycan, rus və ingilis dillərində təhsil verən Azərbaycan Dövlət Aqrar Unıversitetində (ADAU) qonaq qismində iştirakım olub.

Məqsədim heç də qısa bir zaman kəsiyində AMEA-nın müxbir üzvü, professor İbrahim Cəfərovun rəhbərlik etdiy kollektivin daxili və beynəlxalq uğurlarından, "Aqrokimya”, "Torpaqşünaslıq”, "Meliorasiya və hidrotexniki qurğular”, "Qapalı və açıq balıqyetişdirmə laboratoriyaları”, "Quşçuluq”, "Arıçılıq”, "Süni mayalanma” tədris mərkəzləri, "Eksperimental heyvandarlıq kompleksi”, "Anatomiya”, "Patoloji anatomiya muzeyi-auditoriyası”, "Bitki klinikası”, "İstixanalar”, "Maşın-traktor parkı” haqqında, bunların tələbələrin nəzəri biliklərinin praktikaya tətbiqində rolu barədə müfəssəl təəssürat yaratmaq deyil. İstəsəm belə bu kiçik bir yazının mövzusu ola bilməz. Bütün bu inkişaf və tərəqqinin bilavasitə canlı şahidi olmaq üçün gərək bu universitetə gələsən və öz gözlərinlə görəsən…

Dediyim tamam başqa şeydir. Yol boyu xəyalım məni bir anlığa 70-ci illərin tələbəlik həyatına qaytardı.Oxumaq, bilik əldə etmək üçün hansı problemlərlə üzləşməmişdik? Tədris vəsaitlərinin məhdudluğu ucbatından bizə oxunan mühazirələrin hər bir cümləsini qaçırmamaq üçün yazmaqdan barmaqlarımız qabar atardı. Günümüzün böyük hissəsinı müəyyən defisit nüsxələrlə tanış olmaq üçün qiraət zallarında keçirərdik, zaçot və imtahanlara hazırlaşmaq üçün digər mərkəzi kitabxanalara uzun yol qət edib konspekt çıxarardıq. Hələ yataqxana problemi, daha nələr, nələr… Öz-özümə sual verdim. Bəs indi oxumaq, lazımi bilikləri əldə etmək, vətənə layiqli vətəndaş kimi yetişmək üçün daha nə lazımdır? Kimsə mübahisə edə bilər ki, maddiyyat, sosial təminat da zəruri şərtdir. Elə isə, biz oxuyanda maddi vəziyyətimiz və şəraitimiz indikindən qat-qat ağır idi. Lakin, biz oxuduq, çətinliklərə sinə gərdik, ərsəyə yetdik. Çünki, həvəs, istək və səy vardı. Nobel mükafatçısı Amerika-Misir alimi Əhməd Zevaylın gənclərə bir tövsiyəsi ilə fikrimi tamamlamaq istərdim: "Istək ekstremal dərəcədə vacibdir ki, mənə bu gün əldə etdiklərimi nəsib edib. Əgər istək yoxdursa, heç bir şey əldə etmək mümkün deyildir. Məsələn, hər hansı bir ideyan varsa, lakin istək yoxdursa, sən irəliləyə bilməzsən.Sənin istəyə, sevgiyə və gördüyün işə həvəslə yanaşmağa ehtiyacın var."

Bəli, haqqında söhbət açdığım bu universitetdə müəllim və tələbələrə özlərini həsr etdikləri və gördükləri işlərə sevgi, istək və həvəs, qeyri-neft sektorunun inkişafının vacibliyi, aqraqr sektorun ölkəmizin inkişafı və tərəqqisi, müstəqilliyimizin daha da möhkəmlənməsi üçün nə dərəcədə həyatı əhəmiyyət kəsb etməsinə böyük inam və ümid yaradılmasına nail olunub. Məh bu istək həvəs, ümid və inam onları yeni uğurlara sövq etməyin əsas və başlıca amilidir.

Son olaraq onu da qeyd edim ki, bir vaxtlar "Narxoz” adlandırdığımız "Xalq Təsərrüfatı institutu”nun UNEC brendinə çevrilməsi, keçmiş "Kənd Təssərrüfatı institutu”nun ADAU kimi yeni forma və məzmun kəsb etməsi Azərbaycan Respublikası Prezidentinin 2013-cü il 24 oktyabr tarixli Sərəncamı ilə təsdiq edilmiş "Azərbaycan Respublikasında təhsilin inkişafı üzrə Dövlət Strategiyası”nda nəzərdə tutulmuş təhsilin idarə olunmasında başlıca problemlərdən biri təhsildə tənzimləmə, idarəetmə və nəzarət funksiyalarının dəqiq müəyyən edilməsi və təhsil müəssisələrində nəticəyönlü və şəffaf idarəetmə modelinin yaradılması vəzifələrinin reallaşdırılması istiqamətində atılan mühüm addımların bariz nümunəsidir. Uğurlar ADAU… O ki, qaldı mənim istəyimə… kaş ki, bir də tələbə olsaydım…