Rövşən Rzayevin nazirə zəngi Göygöldəki "kadr islahatı"nı hansı məcraya yönəldib?

  • 22 iyun 2020, 16:03
Əmək və Əhalinin Sosial Müdafiəsi Nazirliyinin Dövlət Məşğulluq Xidmətinin Göygöl rayon şöbəsinin rəisi Nazim Cəfərov tutduğu vəzifədən artıq azad edilib. Bir müddətdir ki, barəsində xidməti yoxlamalar həyata keçirilən şöbə rəisinin illərdir ciddi qanun pozuntularına yol verdiyi rəsmiyyətə keçib.
İlkin məlumata görə, Nazim Cəfərov əsasən ÖzünüMəşğulluq Proqramının icrası zamanı maxinasiyalar həyata keçirərək daha çox yoxsul insanları deyil, sabiq icra başçısı Arif Seyidovun tapşırıqlarını və maraqlarını icra edib.
Demokratik.Az-ın əldə etdiyi bilgiyə görə, işindən qovulan Nazim Cəfərov sabiq icra başçısının yaxın adamlarından biri idi. Və məhz onun tezliklə işini itirəcək "Seyidovçu"lardan birincisi olacağı nöqsanlı fəaliyyətlərindən də dolayı gözlənilən olub. Lakin, sabiq icra başçısının axınında üzən "işsizlər rəisi"nin belə tez və "incə" vurulmasının kiməsə faydası da toxunubmuş. Belə ki, illərdir dostu Seyidovun özəl tapşırıqlarını icra etmiş Nazim Cəfərov paralel olaraq DSMF-nin Göygöl rayon şöbəsinin müdiri Ayazi Paşayevlə də qanunsuzluqlara getdiyi bildirilir. Lakin, nazirlik rayon üzrə aparmalı olduğu digər struktur yoxlamasını lokallaşdırıb.
Saytımızın əldə etdiyi bilgilərə əsasən, ƏƏSMN-in Göygöldə həyata keçirməli olduğu "xüsusi yoxlama" ilkin mərhələdə təkcə Nazim Cəfərovun sıradan çıxarılmasına hesablanmayıb. Yoxlama həm də DSMF-nin Göygöl şöbəsində aparılacaq, bu ünvandakı yarıtmazlıqlar da ifşa ediləcəkmiş. Ancaq, bunu önləmək və Seyidovun digər yandaşı Ayazi Paşayevi "təmizdə saxlamaq" üçün tədbirlər işə yarayıb.
Mənbəmiz iddia edir ki, bu işdə Göygöl rayonunun sabiq deputatı, Qaçqın və Məcburi Köçkünlərin işləri Üzrə Dövlət Komitəsinin sədri Rövşən Rzayev iştirak edib. Nazim Cəfərovun "vurulması" ilə yoxlamanın DSMF Göygöl rayon şöbəsindən dərhal uzaqlaşdırılması baş verib.
İddialara görə, Ayazi Paşayev nazirliyin yoxlamasından qorxaraq problemlərini Rövşən Rzayevə danışaraq komitə sədrinin köməyinə sığınıb. Sabiq deputat da Sahil Babayevə telefon zəngi açaraq nazirə xahişini ifadə edib və uzun illərdir himayə etdiyi Ayazi Paşayevi antikorrupsiya burulğanından hifz edə bilib. Ayazi Paşayevin özünün də yaxınlarına bu barədə bilgi sızdırması, olanları danışması iddiaların doğruluğundan xəbər verir. 
Qeyri-rəsmi məlumatlara görə, A.Paşayev öz karyerasını artıq rayonda davam etdirməyəcək, bir sıra məsələləri ört-bas üçün onun artıq Gəncəyə təyinat aldığı, postunu təcili tərk etdiyi də bildirilir. 
Xatırladaq ki, Arif Seyidovun 14 illik postundan uzaqlaşdırılmasından dərhal sonra Demokratik.Az saytının rəhbəri Osman Nərimanoğlu  

GÖYGÖLDƏ GÖZLƏNTİ: "Arif Seyidov getdi, bəs rayondakı qulbeçələri?!" - SİYAHI 

sərlövhəli məqalə ilə çıxış edib, sabiq icra başçısına birbaşa bağlı olan məmurların da rəddinə çağırış edib.
Jurnalistin məqaləsində təqdim etdiyi siyahıda da Ayazi Paşayevin və Nazim Cəfərovun adı özəlliklə yer alırdı.    
Demokratik.Az
Oxşar xəbərlər