Ramiz Mehdiyev erasının sonunu gətirən layihə parlamentdə...
Azərbaycan
hakimiyyətinin əzəmətli və qüdrətli qanadının rəhbəri, mətbuatın azad olduğu
illərdə "boz kardinal” adlandırılan konsey lideri, Prezident
Administrasiyasının rəhbəri Ramiz Mehdiyev erasının rəsmən finalı yaxınlaşır.
2016-cı ildə keçirilən referendumdan sonra yaradılan vitse-prezidentlik
institutunun funksionallığının artırılması ilə başlanmış proses Prezident
Administrasiyası rəhbəri postunun getdikcə əhəmiyyətsizləşdirilməsinə yönəlməkdədir.
AnaXeber.Az-ın Analitik Mərkəzi yazır ki, Rusiyanın Azərbaycanın daxili siyasətinə
imkanlarını azaldacaq bu faktor rəsmiləşdirilərək hüquqi aktla həyata
keçirilir.
Belə ki, Azərbaycanda "Dövlət qulluğu haqqında” qanuna dəyişiklik təklif
olunur. Dəyişiklik qanunun 11-ci (İnzibati və yardımçı vəzifələrin təsnifatı)
maddəsində edilir.
Dəyişikliklə isə təsnifatdan Azərbaycan Respublikasının Dövlət müşavirləri vəzifəsi
çıxarılır. Maddədən (inzibati vəzifələrin birinci təsnifatı) Azərbaycan
Respublikası Prezidentinin Administrasiya rəhbərinin müavini vəzifəsi də
çıxarılır.
Layihə Milli Məclisin plenar iclasına tövsiyə olunub. PA rəhbərinin müavini vəzifələri
2012-ci ildə yaradılmışdı. Hazırda PA rəhbəri Ramiz Mehdiyevin 3 müavini
var.
Bunlar Əli Əsədov, Zeynal Nağdəliyev və Novruz Məmmədovdur. Dəyişiklikdən sonra
bu şəxslər PA rəhbərinin müavinləri hesab olunmayacaqlar.
Bundan sonra PA rəhbəri postu daha çox formal xarakter daşımağa başlayacaq.
Parlamentin bu qanun layihəsinə yekdilliklə səs verəcəyi böyük
ehtimaldır.
Bir zamanlar R.Mehdiyevin basdığı düymə və dirijor çubuğu ilə hərəkət edən
Milli Məclis artıq PA rəhbərinin karyerasının qürub çağında yüksələn xətt üzrə
inkişaf edən yeni qüvvənin sözünü eşitməli olacaq.
Yeni qüvvənin avanqarda çevrilməsi isə vitse-prezidentlik institutunun əhəmiyyətini
artırmağı və PA rəhbəri vəzifəsini formallığa çevirməyi diktə edir.
Bu gedişat R.Mehdiyevin müavinlərsiz qalacağı demək olsa da, vəzifəsindən azad
ediləcəyi kimi qiymətləndirilə bilməz.
Baş nazir Artur Rasi-zadə kimi, onun da siyasi nəfəsini PA kluarlarında
saxlayacaqlar. İndi ölkə yeni mərhələyə qədəm qoyur. Atalar və oğullar dönəmi
başlanır.
R.Mehdiyevin yerinə fövqəladə hallar nazirinin müavini işləyən oğlu onun siyasi
yükünü daşımağa çalışacaq.
Necə ki, mərhum spiker Murtuz Ələsgərovun övladı siyasi karyerasının ən yaxşı
vaxtlarından birini yaşayır. R.Mehdiyev isə M.Ələsgərov deyil.
Onun Azərbaycanın idarə olunmasında, seçkilərin həllində, müxalifət, mətbuat, həbslər,
eləcə də beynəlxalq münasibətlər kontekstində siyasi strategiyası var.
Naxçıvan klanının lideri olan akademikin strateji xəritəsi dünənə kimi idarəçilik
modelində tətbiq olunurdu.
Amma 2013 seçkilərindən sonra mövqeyini əldən verməkdə olan PA rəhbərinin "Dövlət
qulluğu haqqında” qanuna dəyişikliklə tamamilə siyasi təsir imkanları məhdudlaşdırıla
bilər.
I vitse-prezident təyinatından əlavə yeni ildən vitse-prezidentlərin də adları
məlum ola bilər. Bu da siyasi-iqtisadi idarəçilikdə vitse-prezidentlik təsisatının
fəaliyyətini sürətləndirəcək.
Ancaq sözügedən institut hələlik Azərbaycanda oturuşmadığı üçün Prezident
Administrasiyasının və Nazirlər Kabinetinin fəaliyyəti müəyyən müddət formal
davam edəcək.
AnaXeber.Az-ın Analitik Mərkəzi yazır ki, R.Mehdiyevin siyasi süqutu Azərbaycanın
xarici siyasətində də öz əksini tapacaq.
Akademikin 1995-ci ildən Moskvanın siyasi kluarlarında qurduğu münasibətlər rəsmi
Bakının hər zaman Rusiyanın sözünü eşitməsi, seçkilərin taleyi ilə müşayiət
olunub.
R.Mehdiyevin məqalələrində heç zaman anti-Rusiya ritorikası, Kremlin ölkəmizə
zaman-zaman təzyiqləri haqda tezislərə rast gəlmək olmaz.
Lakin onun yazılı çıxışlarının əksəriyyətində Avropa ikili standartlarda,
riyakarlıqda ittiham olunur, qlobal terrorun Qərbdəki dairələr tərəfindən
maliyyələşməsi, Avropanın "5-ci kolon”unun Azərbaycanda fəallaşdırılması
nüansları yer alır.
Hərçənd, əsla Rusiyanın ölkəmizdəki "5-ci kolon”un haqda bir sətir yazmayıb.
Çünki R.Mehdiyevin siyasi təsirlərinin güclü dönəmində bir sıra strateji və
mühüm məsələlər Moskvada razılaşdırılmamış həyata keçirilməyib.
Akademik "Yeni dünya nizamı və milli ideya” əsərində siyasi-fəlsəfi müstəvidə
qloballaşmanı "daxili sosial münasibətlərin formasını dəyişir”, "cəmiyyəti Qərbləşdirir”,
"milli mədəniyyəti dağıdır” və s. bu kimi yanaşmalarda təqdim edir.
Bu baxımdan PA rəhbərinin siyasi nüfuzunun təsir imkanları yeni qanun layihəsi
ilə məhdudlaşacağı halda, rəsmi Bakının Rusiya və Qərb siyasətində ciddi dəyişikliklər
müşahidə olunacaq.
Əslində, Mehdiyev erasının rəsmən bitirilməsi prosesinə 2010-cu ildən -
Avropaya qaçan rektor Elşad Abdullayevin Gülər Əhmədova ilə olan mandat alveri
kasetini yayması ilə başlanmışdı.
Ancaq özünü toparlamağa müvəffəq olan bu siyasi klan 2015-dən sonra sürətlə zəifləməyə
doğru getməkdədir.
Qeyd edək ki, Vəzirov hakimiyyətə gələn kimi ilk plenumda Heydər Əliyevin və
onun ətrafına qarşı çıxanlardan biri təəccüblü olsa da Ramiz Mehdiyev olub.
Heydər Əliyevin bunca yaxşılıqlarına rəğmən həmin tarixi plenumda Ramiz
Mehdiyev mən «Heydər Əliyevin adamı olmamışam» fikirlərini işlətməkdən belə çəkinməyib.
Amma Moskva hər şeyi əlinin içi kimi bilirdi və 1988-ci ildə Ramiz Mehdiyev KP
MK-nin katibi vəzifəsindən çıxarıldı.
Lakin Heydər Əliyevə qarşı dönüklüyü də nəzərə alınır və Mehdiyev 1988-ci ilin
1 iyun tarixində Azərbaycan Elmlər Akademiyasının ictimai-siyasi təvqiqatlar və
informasiya institutuna şöbə müdiri təyin edilir.
Maraqlı tərəf bundadır ki, 80-ci illərin sonu 90-cı illərin əvvəllərində
imperiyanın çöküşü, dövlət çevrilişləri, milli hakimiyyət və yenidən hakimiyyət
dəyişiklikləri baş versə də, Ramiz Mehdiyev bir gün də olsun işsiz qalmayıb -
indiyədək...
AnaXeber.Az
Turan