80 minlik oğurluq edənlərin cəzası azaldıldı

Bakı Apellyasiya Məhkəməsində hakim Əflatun Qasımovun sədrliyi ilə oğurluqda təqsirləndirilən Yevgeni Şepiya və Xalid Gülməmmədov barəsində olan hökmdən verilən apellyasiya şikayətinə baxılıb. Prosesdə elan olunan qərarə əsasən, təqsirləndirilən şəxslərin apellyasiya şikayətləri qismən təmin edilib, birinci instansiya məhkəməsinin çıxardığı hökm dəyişdirilib.  X.Gülməmmədovun 8 il müddətinə azadlıqdan məhrumetmə cəzası 6 il 6 aya, Y.Şepiyanın 8 il müddətinə azadlıqdan məhrumetmə cəzası isə 6 ilə endirilib.

Oğurluq hadisəsi ötən ilin dekabrın 24-də Sabunçu rayonunda baş verib. Bu rayonda yaşayan Vidadi Hüseynovun evindən pəncərədən girmək yolu ilə məişət əşyaları və dəmir seyfdən qapısı sındırılaraq 80 min manat dəyərində qızıl əşyalar oğurlanıb. Polisin əməliyyat-axtarış tədbirləri nəticəsində hadisəni törətməkdə şübhəli bilinən Bakı şəhər sakinləri Y.Şepiya və X.Gülməmmədov saxlanııb vı onlara qarşı Cinayət Məcəlləsinin 177.3.2-ci (külli miqdarda ziyan vurmaqla oğurluq) maddəsi ilə ittiham irəli sürülüb. Bu il may ayının 16-da Bakı Ağır Cinayətlər Məhkəməsinin hökmü ilə Y.Şepiya və X.Gülməmmədovun hər biri 8 il müddətinə azadlıqdan məhrum edilib. Hökmdən narazı qalan məhkumlar apellyasiya şikayəti veriblər.