Demokratik TV
Dünyamin Xəlilov həbs olundu
Virtualaz.org saytının "Harvey Nichols” brendinin Dünyamin Xəlilova görə ziyana düşməsi barədə məqaləsinin dərc edilməsinin ardınca "Qafqazinfo” dəqiqləşdirib ki, keçmiş deputat elə bu günlərdə həbs olunub.
Əslində Nərimanov rayon məhkəməsi onun barəsində ötən il mayın 15-də 4 aylıq həbs qətimkan tədbiri seçmişdi. Lakin D.Xəlilov nəyə görəsə həbs edilməmişdi və dindirilmək üçün "Bandotdel”ə aparılsa da azadlıqda idi.
* * * 14:40
Britaniyanın məşhur "Harvey Nichols” brend geyim mağazaları şirkəti ötən il gəlirlərinin 30 faiz azaldığını, bu səbəbdən biznesdə "aqressiv rekonstruksiyaya” gedəcəyini elan edib.
Virtualaz.org Britaniya biznes-mediasına istinadən xəbər verir ki, şirkət gəlirlərinin kəskin azalmasının səbəblərindən biri kimi Azərbaycandakı "General Construction” şirkəti ilə bağlanmış françayzinq müqaviləsinin uğursuzluğa düçar olmasını göstərir.
"Harvey Nichols” Azərbaycan Beynəlxalq Bankının keçmiş sədri Cahangir Hacıyevin biznes ortaqları olan Xaqani Bəşirov və keçmiş deputat Dünyamin Xəlilova məxsus "Globus Plaza” ticarət mərkəzində fəaliyyətə başlasa da qısa müddətdən sonra müqaviləni pozaraq ölkəni tərk edib. Şirkət bildirir ki, "Harvey Nichols” Azərbaycanda cəmi 4 ay fəaliyyət göstərə bilib.
Britaniya brendi Azərbaycanda 2015-ci ilin martında fəaliyyətə başlamışdı və bu münasibətlə yaydığı press-relizdə bildirirdi: "Harvey Nichols” Bakıda yeni mağazasını açdığını fəxrlə elan edir və azərbaycanlı alıcılara eksklüziv moda,gözəllik və qonaqərvərlik təqdim edir”.
Lakin cəmi 4 ay keçəndən sonra 2015-ci ilin iyul ayında "Harvey Nichols” bu dəfə qısa və quru bəyanatla çıxış edərək Azərbaycandakı ortağı ilə müqaviləni dayandırdığını bildirdi. Aydın idi ki, Britaniya brendinin Azərbaycanda bu cür aldadılması Beynəlxalq Bank ətrafında gedən proseslərlə əlaqəli idi və Cahangir Hacıyevin müflis olan biznes kompanyonları "Harvey Nichols”la müqavilənin şərtlərini yerinə yetirə bilməmişdilər. Çünki həmin Dünyamin Xəlilov və Xaqani Bəşirov Bynəlxalq Banka yüz milyonlarla dollar borcludur.
"Kredit oliqarxları”nın işi çərçivəsində Dünyamin Xəlilov bir neçə dəfə saxlanılıb və "Bandotdel”ə aparılıb. Ancaq o, nədənsə həbsdən yayına bildi, baxmayaraq ki, götürdüyü kreditlərin böyük hissəsini hələ də qaytarmayıb. Dünyamin Xəlilov həbsdən yayınsa da onun şirkətinin heç bir təsqiri olmayan aşağı rütbəli işçilərini həbs ediblər.
Xatırladaq ki, Dünyamin Xəlilovun ortağı Xaqani Bəşirov isə vaxtında ölkəni tərk edə bilib və hazırda Fransadadır.
F.Məmmədov
Virtualaz.org
