"Xocalıya ədalət" dünya şüarına çevrilir - FOTO, VİDEO

Amsterdamda Xocalıya rekviem

Fevralın 26-da Amsterdamda Azərbaycanın ən böyük diaspor təşkilatlarından olan Avropa Azərbaycanlıları Konqresinin (növbədənkənar) VI Qurultayı və Xocalı soyqırımının 26-cı ildönümünə həsr edilmiş mərasimlərə start verilib.

Musavat.com bildirir ki, 26 fevral, axşam saatlarında Amsterdam şəhərində "De Rode Hoed (The Red Hat)” Mərkəzində simfonik orkestrin iştirakı ilə Xocalı soyqırımının 26-cı ildönümünə həsr edilmiş rekviyem -konsert baş tutub. Bu barədə Amsterdamda keçirilən tədbirlərində iştirak edən heyətin üzvü, "Yeni Müsavat” Media Qrupunun rəhbəri Rauf Arifoğlu məlumat verib.

Axşam saatlarında baş tutan prorqam Azərbaycan Respublikasının dövlət himninin oxunması ilə başlanıb. Daha sonra Heydər Əliyev Fondunun "Xocalıya Ədalət” Beynəlxalq Məlumatlandırma Kampaniyası çərçivəsində hazırladığı qısa filmin təqdimatı keçirilib. Tədbirdə həmçinin Vyana Konservatoriyasının tələbəsi Onidia Danger də Azərbaycanla bağlı öz fikirlərini bölüşüb.

Anım tədbiri Azərbaycan və dünya klassikasına aid olan həzin musiqi ifalarının müşayiəti ilə keçirilib.

Tədbirdə Prezident Aparatı ictimai-siyasi şöbəsinin rəhbəri, prezidentin köməkçisi Əli Həsənov, "Kaspi" Mətbuat və Təhsil Mərkəzinin rəhbəri, "Kaspi" qəzetininin təsisçisi Sona Vəliyeva, Azərbaycan Diasporla İş üzrə Dövlət Komitəsinin rəhbəri Nazim İbrahimov və komitənin digər rəhbər şəxsləri, xalq şairi Sabir Rüstəmxanlı, Azəri Türk Qadınlar Birliyinin sədri Tənzilə Rüstəmxanlı, Avropa Azərbaycanlıları Konqresinin prezidenti Sahil Qasımov, AAK -ın vitse-prezidenti, iş adamı Fizuli Məmmədov, eləcə də ölkə mediasının tanınmış simaları – APA Holdinqin rəhbəri Vüsalə Mahirqızı, Gündəlik Teleqraf Media Holdinqin rəhbəri Aynur Camalqızı, haqqın.az və virtualaz.org saytlarının rəhbəri Eynulla Fətullayev, İctimai Televiziya və Radio Yayımları Şirkəti Yayım Şurasının üzvü Azər Həsrət, "Yeni çağ" qəzeti və yenicag.az saytının baş redaktoru Aqil Ələsgər, Azərbaycan-Türkiyə Evinin İcraçı direktoru, Azərbaycan Diasporu İnformasiya Mərkəzinin sədri Toğrul Allahverdili və digər jurnalistlər iştirak edib.

Konsert-rekviemi izləyənlər arasında Hollandiyanın tanınmış ictimai-siyasi xadimləri, eyni zamanda vətəndaş cəmiyyətinin üzvləri və jurnalistlər, Avropa Azərbaycanlıları Konqresinin dünyanın bir çox ölkələrində yaşayan təmsilçiləri də olub.

Axar.az xəbər verir ki, 27 fevralda Amsterdamda Azərbaycana aid daha bir tədbir də keçiriləcək. Azərbaycanın ən böyük diaspor təşkilatlarından olan Avropa Azərbaycanlıları Konqresinin (növbədənkənar) VI Qurultayının açılışı olacaq. Əvvəlcə, Avropa Azərbaycanlıları Konqresinin İdarə Heyətinin hesabatı dinləniləcək. Mandat komissiyasının məlumatından sonra Avropa Azərbaycanlıları Konqresinin rəhbər orqanlarının yeni tərkibi formalaşdırılacaq.

İkinci paneldə "1918-ci il azərbaycanlıların soyqırımının 100 illiyi haqqında" Azərbaycan Respublikası Prezidentinin Sərəncamına uyğun olaraq Avropa ölkələrində 1918-ci il 31 mart azərbaycanlıların soyqırımının yüzilliyinin qeyd edilməsi ilə əlaqədar Avropa Azərbaycanlıları Konqresinin Tədbirlər Planı layihəsi müzakirəyə çıxarılacaq.

"Azərbaycan diasporu və Azərbaycan mediası: əməkdaşlıq səviyyəsi, problemlər və onların həlli yolları" (KİV və diapor təşkilatları rəhbərlərinin iştirakı ilə) adı ilə keçiriləcək digər panel jurnalist Azər Həsrətin moderatorluğu ilə baş tutacaq.