“Kişi qırığı” - “Alabala” - Səhv düşəndə yeriniz...
Səhv düşəndə yeriniz...
Son günlər xalqı aşağılayan məmurlar və deputatların siyahısına daha birinin əlavə olduğunu gördük. Milli Məclisin deputatı Astan Şahverdiyevin azərbaycan vətəndaşlarını "otxod” adlandırması ictimaiyyətdə etirazların hərarətini bir qədər də yüksəltdi. Deputat üzr istəsə də, ölkədə artan maliyyə böhranı konteksində əsəb yaradan bu cür açıqlama ilk olmadı. Yaxın keçmişdə yaddaşlarımızı təzələyərək, nəzər salaq, daha kimlər öz nitqlərində saymazyana həqarət və təhqirlərə müraciət edib?
Fevral, 014. Hacıbala Abutalıbov: "Bizim ölkədə
bir dənə kişi kişi var”.
May, 2014. Hacıbala Abutalıbov : "Gedin işinizin dalınca.
Mən jurnalist görəndə elə bilirəm ki, qəbirdə ölü görürəm”.
Oktyabr, 2014. Etibar Hüseynov. Öz Facebook profilində bir sürü qoyun şəkli paylaşıb,
altına da "Məhsul stadionuna getməyi unutma” yazaraq, öz haqlarını tələb edən
insanları aşağılayıb qoyuna bənzədir.
İl 2015. Hadı Rəcəbli: "Müəllim dolana bilmirsə, işdən sonra daş da
hörsün”, - deyərək, maaş artımını gündəmə gətirməkdənsə, müəllimləri başqa bir
yönə - fəhləliyə, daş hörməyə dəvət edir.
May, 2015. Abit Şərifov. KİV haqqında qanunun 8-ci və 50 maddəsində qeyd olunan
informasiya almaq hüququnu pozaraq, insanların ölümünə səbəb olan yanan bina ilə
bağlı jurnalistlərin "Tikinti işlərinə hansı şirkət daxil olacaq?” - sualına
Abid Şərifov:
"Nə dəxli var sənə?! Nə üçün bilməlisən kimdir?! Alabala… Sonra?! Müəyyən
olunur ki, filankəsdir, filankəsdir də. Bunu biz müəyyən edirik, bunun
"pressa”ya dəxli var?” - deyərək, mətbuata mənfi tonda, aqressiyalı sualla
reaksiya verir.
Dünya praktikası. Uzağa getmirik, qardaş Türkiyə: İl 2016. Türkiyə Cumhuriyyətinin
Prezidentinin mətbuat katibi Şərəf Malkoç "Yeniqapı” mitinqində iştirak edəcək
MHP sədri Dövlət Baxçəliyə: "Nə gözəl! Ömründə, həyatında heç görmədiyi insan
selinini görəcək”, - deyərək, həqarət etmişdi. 24 saat keçmədən, ictimaiyyətin
reaksiyasına ehtiyac olmadan, AKP demokratları dərhal işə qarışdılar. Nəticədə,
Malkoç "Sarf ettiğim bir cümle sebebiyle başta Sayın Bahçeli'nin şahsından ve
tüm MHP camiasından özür dilerim”, - deyərək öz səhvini etiraf etmişdi. İştə, sənə
demokratiya!
Nəticə: Aşağılanan milyonlar, istefa verən - 0, üzr istəyən - 1. Bu da riyazi
dillə desək, tərs mütənasiblik. Bədii, Qabil dili ilə desək, səhv düşəndə
yeriniz...
P.S. Yerinə düşər ki, bu multikulturalizm ili bitmədən, üzr istəmə siyahısına
yuxarıdakı şəxslər də qoşulsunlar.
Arzu Səyyad