ABŞ-ın Yuta Ştatı Azərbaycana dair bəyannamə qəbul edib

ABŞ-ın Yuta ştatının Senatı və Nümayəndələr Palatası Azərbaycan ilə bağlı bəyannamə qəbul edib.
Azərbaycanın Los Ancelesdəki Baş Konsulluğundan verilən xəbərə görə, Yuta Ştat Senatının sədri Stuart Adams, Nümayəndələr Palatasının spikeri Brad Uilson, eləcə də digər qanunvericilər tərəfindən imzalanmış bəyannamə Konsulluğa təqdim olunub./azərtac/
Bəyannamədə, Azərbaycanın müsəlman dünyasında ilk demokratik və dünyəvi dövlət olduğu və qadınlara ilk dəfə seçki hüququ verdiyi qeyd edilir.
Həmçinin, Azərbaycanın tarixi tolerantlıq ənənələrinə toxunularaq, burada qədim zamanlardan müxtəlif dinlərin, o cümlədən müsəlmanların, xristiyanların və yəhudilərin sülh və əmin-amanlıq şəraitində birgə yaşadığı ifadə olunur.
Bildirilir ki, qədim dinlərarası tolerantlıq ənənələrini təşviq edən və gücləndirən bir mühit yaratmış Azərbaycan dini və etnik müxtəlifliyi öz milli sərvəti kimi dəyərləndirir. Qeyd olunur ki, son 10 ildə Azərbaycan dinlərarası dialoqu təşviq etmək üçün regiondan və dünyanın müxtəlif ölkələrindən din xadimlərini dəfələrlə bir araya gətirib.
Sənəddə, Azərbaycanın ABŞ və Yuta ştanın güclü tərəfdaşı olduğu və ABŞ ilə Azərbaycan arasında strateji tərəfdaşıq münasibətlərinin inkişaf etdiyi diqqətə çatdırılır.
Bəyannamənin sonunda, Yuta Şenatı və Nümayəndələr Palatası Azərbaycanın dünyada azadlığın müdafiəsi və sülhün qorunması işinə verdiyi töhfələri yüksək qiymətləndirdiyini və Azərbaycan ilə qarşılıqlı faydalı dostluq münasibətlərinin qorunmasına böyük önəm verdiyini bildirir.