Gəncədə üçüncü “E” – İkinci şəhərin Birinci adamı

ELMAR VƏLİYEVLƏ YENİLƏŞƏN 6 İLLİK GƏNCƏ MODELİ

Son illər prezident cənab İlham Əliyevin şəxsi siyasi iradəsi, xüsusi diqqət və qayğısı ilə ölkənin iqtisadi-sosial inkişafı Gəncədən də yan keçməyib. Azərbaycanın ikinci iri şəhəri olan dahi şeyx Nizami yurdunun təkcə Avropa çapında deyil, həm də dünyəvi şəhər səviyyəsinədək yüksəldilməsi prosesi gedir. Hakimiyyətin ən ali ranqlı, yüksək səlahiyyətli çinovnikləri – nazirlər və komitə sədrləri də prosesdə yaxından iştirak edərək, möhtərəm prezidentimizin Gəncəyə dair zəruri dövlət siyasətinin icrasına həssaslıqla yanaşırlar. Hamı Gəncənin hərtərəfli inkişafına səfərbər olub. Bəs, bu məqamda 2011-ci ilin fevralından Gəncəyə başçılıq edən Elmar Vəliyev ölkə başçısının etimadını doğruldubmu?  Sizcə, "dinamik sürətli” Elmar Vəliyev yeniləşən Gəncədə ona həvalə olunan işlərin öhdəsindən layiqincə gəlibmi? Bu sualın cavabını oxucuların ixtiyarına veririk.

Elmar Vəliyevin tarixi şansı – bəs nəticə? 

Bu gün E.Vəliyevin Gəncə İHB başçısı təyinatının 6 ili tamam olur. Elmar Vəliyevin Gəncəyə başçı təyinatı elə bir dönəmə, məqama təsadüf edib ki, Azərbaycanın ikinci böyük şəhərinə Avropanın da diqqəti xeyli artıb. Bu,  icra başçısının karyerasında hələlik əldə etdiyi ən parlaq şansıdır. Avropa və Asiya arasında tarixi-coğrafi önəm daşıyan Gəncənin son illərdə "Avropa Gənclər Paytaxtı” adına sahiblənməsi kimi nailiyyət də təsadüfdən baş verməyib. Bilməyənlərin bunu bilməsi lazımdır. Elmar Vəliyevin üzərinə ağır məsuliyyət düşüb. O prezidentin tarixi etimadını doğrultmağa, Gəncədəki  missiyasını dövlətçilik və ümummilli maraqlara uyğun qurmağa mükəlləf olub. Bəs o bunu geridə buraxdığımız 6 ildə bacarıbmı? Bacarıbsa nə dərəcədə, hansı ampulada? Bu sualların cavabını birmənalı vermək olmaz. Amma məsələnin görünən tərəflərinə nəzər salacağıq.

Gəncədə üçüncü "E”-zərurətin təsadüfü

Tarixi inqilabların beşiyi olan, Azərbaycanın milli ruhunu daim özündə yaşadan Gəncə şəhəri müstəqillikdən bəri adının ilk hərfi "E” ilə başlayan ardıcıl üçüncü icra başçısının – Elmar Vəliyevin idarəçiliyinə şahidlik etməkdədir. Diqqətçəkən odur ki, sonuncu öncəki sələfləri birinci "E”-Eyvaz Babayevdən və ikinci”E”-Eldar Əzizovdan zövqünə, abadlıq-quruculuq bacarığına görə xeyli fərqlənir. Dinamikası bəlkə də əvəzolunmazdır. Amma ətrafında yaratdığı səs-küy, fırtına, qalmaqallar və vahiməsi də müqayisə olunmazdır. Xüsusilə vurğulayaq ki, Gəncəyə təyin olunan böyük ”E”-lərin belə bir ardıcıllığı, zərurətin təsadüfü olub.

2003-2011-ci illərdə və 2011-ci ildən bu vaxtadək Gəncə şəhər İcra hakimiyyətinin başçısı olmuş bu iki şəxsin fəaliyyətini müqayisə edəndə maraqlı nüanslar ortaya çıxır.

Gəncədə bu gün özəl sektorda fəaliyyət göstərən, şəxsi investisiyalarla inşa edilmiş binaların və biznes obyektlərinin(yaşayış binaları, dükanlar, şadlıq sarayları və s.) az qala 90%-nin tikilməsi və yaxud təməl qoyulması Eldar Əzizovun dövrünə təsadüf edib.

Elmar Vəliyevin dövründə reallaşmış böyük layihələrin 90% isə ya birbaşa, yaxud da dolayısı ilə dövlət investisiyaları hesabına həyata keçirilib.

Ötən son 6 ildə"Regionların İnkişafı"" Dövlət Proqramı çərçıvəsində hər il stabil olaraq Gəncədə gerçəkləşən həcmli layihələrə dövlət büdcəsindən, yaxud da Prezidentin Ehtiyyat Fondundan on milyonlarla manat ayrıldığının şahidi oluruq.

Bəs görəsən hansı səbəblərdən Elmar Vəliyevin dövründə Gəncəyə özəl investisiyaların qoyuluşu demək olar tam ölüb?

Bunun başlıca səbəbləri kimi sözsüz ki, Elmar Vəliyevin öz fəaliyyəti ərzində sahibkarlara və iş adamlarına qarşı törətdiyi çoxsaylı qanunsuzluqları və özbaşınalıqları göstərmək olar.
Elmar Vəliyevin 6illik fəaliyyəti sayəsində bu gün iş adamlarının Gəncə şəhərində öz investisiyalarının təhlükəsizliyinə, əmlaklarının və biznesinin toxunulmazlığına heç bir güvəni qalmayıb.

Çünki, Elmar Vəliyev kefinə düşdüyü vaxt, gözünə "əyri dəyən", xoşuna gəlmədiyi istənilən obyekti ya ekskavatorun qabağına verib uçura bilər, yaxud da uçurmaqla, bağlamaqla hədələyib sahibkarı qorxudabilər. Beləcə 6  illik təcrübə göstərir ki, Gəncədə heç nə sahibkarın obyektinin sökülməyindən sığortalamır.

Görünür ki, bu səbəblərdən də neçə illərdir sahibkarlar Gəncədə iri layihəyə sərmayə qoymaqdan vaz keçməli olurlar və sonucda da əhali yeni iş yerlərindən, dövlət isə gəlirdən qalır...

Hərçənd ki, Gəncədə normal yanaşma mövcud olsaydı, bu neçə ildə normal biznes mühiti yaradılsaydı və investisiyaların təhlükəsizliyi təmin olunsaydı, ölkənin özündən də, xaricdən də on milyonlarla sərmaye cəlb etməklə neçə min insanı işlə təmin etmək və şəhər büdcəsini lazım olan vəsaitlərlə doldurmaq olardı... 
Ancaq Elmar Vəliyevin "parlaq" fəaliyyəti nəticəsində Gəncə bu fürsətləri hələlik əldən verdi.

Bu gün neftin qiymətinin dünya bazarında kəskin düşdüyü bir vaxtda, dövlət büdcəsinin real kəsirləri yarandığı bir dövrdə Gəncədə hökm sürən acınacaqlı mühit çox böyük problemərə yol aça bilər. Təbbi ki, yazdıqlarımız Elmar Vəliyevə qərəzdən irəli gəlmir, sadəcə bir həyəcan təbilidir. Çıxış yolu təbbi ki, var. Buna görə, dərhal Gəncədə biznes mühitinin sağlamlaşdırılmalıdır və iş adamlarının yerli hakimiyyət nümayəndələrinə itmiş etibarı sürətlə bərpa olunmalıdır.

Yoxsa, bol büdcə pullarının dayanmadan daxil olmasına öyrəşmış, yerli sahibkarların və əhalinin etibarını tam olaraq itirmiş Elmar Vəliyevlə qarşıda bizi gözləyən iqtisadi-sosial çətinliklərdən yaxa qurtarmaq mümkün olmayacaq. Elmar Vəliyev bu barədə düşünməlidir!

YALAN VƏDLƏR KRALI - ELMAR VƏLİYEV.
Azərbaycan Respublikası Prezidentinin 18 fevral 2011-ci il tarixli sərəncamına əsasən Gəncə Şəhər İcra Hakimiyyətinin başçısı vəzifəsinə təyin edilən Elmar Vəliyev ölkə başcısının və gəncəlilərin qarşısında ona göstərilən etimadı doğruldacağına dair söz versə də bu müddət ərzində şəhər əhalisinə verilən vədlər və hələ də icrasına başlamayan layihələr vəziyyətin heç də ürəkaçan olmadığını göstərir. 
Mütəmadi olaraq müxtəlif saytlarda piar olunan "Gəncədə filan layihə başlayır”, "Gəncədə filan zavod açılır”, "Gəncədə filan qədər iş yerləri açılır” başlığı altında xəbərlər tirajlansa da, əslində reallıq bundan ibarətdir ki, Elmar Vəliyevin yarıtmaz fəaliyyəti nəticəsində Gəncə iri sənaye şəhərindən ən iri işsizlik şəhərinə çevrilib!
"Demokratik..Az” yalan xəbərlərin və vədlərin kiçik bir hissəsini sizlərə təqdim edir:
"GƏNCƏDƏ TRAMVAY OLACAQ"

– 2013 il noyabrın 20-də Gəncə şəhər İcra Hakimiyyəti ilə bu şəhərdə tramvay yolunu inşa edəcək Fransanın «Newtl» şirkəti arasında memorandum imzalanıb. 
Daha sonra xaric şirkətin iştirakı ilə layihənin təmtəraqlı təqdimatı keçirilib.
Lakin o gündən bu günə qədər həmin layihədən heç bir xəbər yoxdur.
"GƏNCƏDƏ YENİ VAQON İSTEHSALI ZAVODU TİKİLƏCƏK"

– 2014 - Gəncə şəhər İcra Hakimiyyətinin başçısı Elmar Vəliyev 2014-cü ilin ikinci yarısının hesabat yığıncağında bildirmişdi ki, Gəncədə 400-dən çox adamın işləyəcəyi zavod tikiləcək. Həmçinin qeyd edib ki, zavodun tikintisi üçün Gəncə Dəmiryol Vağzalı yaxınlığında yer ayrıldığını da bildirmişdi. Prezident İlham Əliyev və xanımı Mehriban Əliyeva Gəncə şəhərində "Stadler” vaqon istehsalı zavodunun təməlqoyma mərasimində də iştirak ediblər.
Bildirilib ki, İsveçrənin "Stadler Rail Group” şirkəti ilə Azərbaycanın "Railway İnternational Distribution” MMC arasında Gəncədə vaqon istehsalı üzrə birgə müəssisənin yaradılması haqqında müqavilə imzalanıb. 
Müqavilənin şərtlərinə əsasən Azərbaycanın Gəncə şəhərində ilkin olaraq ildə 60 vaqon istehsal gücünə malik zavod inşa ediləcək.
Mətbuatda kifayət qədər piar olunan bu xəbər də digərləri kimi yalan vədlərdən başqa bir şey deyildi. 
2017-cı il olmasına baxmayaraq bu istiqamətdə bu günə kimi heç bir iş görülməyib, daş daş üstünə qoyulmayıb.
"GƏNCƏDƏ 5 ZAVOD TİKİLƏCƏK"

 – 2014-cü il may ayının 30-da Gəncə şəhər İcra Hakimiyyətinin başçısı Elmar Vəliyev mətbuata verdiyi açıqlamada bildirmişdir ki, Yaponiyadan olan mütəxəssislərin iştirakı ilə yeni yaradılacaq zavodlar bir-biri ilə əlaqəli işləyəcək və məhsul əvvəldən axıra kimi heç bir yerə getmədən Gəncədə olan müəssisələrdə hazırlanacaq. Zavodlarda 13 minə yaxın insan işlə təmin ediləcək. Lakin icra başçısının bu vədi də digər vədləri kimi "yalan vədlər” sırasına əlavə olunub. 
Bu günə qədər bu istiqamətdə heç bir iş görülməyib.
Nə Yaponiyadan gələn mütəxəssislər işə başlayıb, nə də ki, zavod fabriklərdən əsər əlamət var.
"GƏNCƏ STADİONU ƏN MÜASİR SƏVİYYƏDƏ YENİDƏN İNŞA OLUNACAQ”

-Gəlişinin ilk aylarında Azərbaycan Dövlət Aqrar Universitetində görüşündə şəhər stadionunun təməlli olaraq yenidən tikiləcəyinə - inşaasına vəd verib, amma bu vədi də quru söz kimi yadda qalıb.

"YAŞIL TEATRIN YERİNDƏ NİZAMİ MƏRKƏZİ"

-"Xan Bağı” İstirahət parkına bitişik, vaxtilə "Yaşıl Teatr” kimi tanınan yer indi zibilliyə döndərilib. Elmar Vəliyev deyirdi ki, bura "NİZAMİ MƏRKƏZİ” olacaq - bu da olmadı…

"GƏNCƏDƏ OLİMPİYA PARKI TİKİLƏCƏK."
-21 yanvar 2014-cü ildə Azərbaycan Respublikasının Prezidenti İlham Əliyev Gəncədə Olimpiya Parkının təməlqoyma mərasimində iştirak edərək Gəncə Olimpiya Parkının təməlini qoydu. 
Dövlət başçısına məlumat verildi ki, Gəncə Olimpiya Parkı böyüklüyünə və xidmət səviyyəsinin müxtəlifliyinə görə MDB məkanında yeganə belə idman obyekti olacaqdır. Burada idmanın bütün növləri ilə məşğul olmaq üçün hərtərəfli şərait yaradılacaqdır. Olimpiya Parkı son illərdə sürətlə inkişaf edən Gəncənin ümumi görünüşünə əlavə yaraşıq verəcəkdir.
Lakin təməlqoyma mərasimindən artıq iki il keçməsinə baxmayaraq, ərazidə heç cüzi bir iş də aparılmayıb. Hərçənd əldə etdiyimiz məlumata görə Elmar Vəliyev bu layihəni şəhərin öz daxili gücü hesabına ediləcəyini söz vermişdi.
Beləliklə tam əinliklə söyləmək olar ki Elmar Vəiyevin "Gəncə Olimpiya Parkı" get gedə Ostap Benderin "Nyu-Vasyuki"sini xatırladır.
"GƏNCƏDƏ YENİ TEATR BİNASI TİKİLƏCƏK"

 – 26 may 2014-ci ildə Vaqif Şərifovun 70 illik yubileyinə həsr edilmiş tədbir zamanı Gəncə Şəhər İcra Hakimiyyətinin başçısı Elmar Vəliyev mətbuata açıqlamasında bildirmişdir ki, bu yaxınlarda Gəncə şəhərində Dramatik teatr üçün yeni bina tikiləcək. Təməltökmə mərasimindən xeyli müddət keçməsinə baxmayaraq bu layihə də icrası aparılamayan layihələr sırasındadır.
"GƏNCƏDƏ MÜASİR TİPLİ TAKSİ ŞƏBƏKƏSİ YARADILACAQ"

– 27 mart 2013-cü il. Gəncə şəhər İcra Hakimiyyətinin başçısı Elmar Vəliyev: "Özəl taksilər üçün işıqforlardan 15 metr ya arxada ya da ki, qabaqda xüsusi yerlər müəyyənləşəcək. Bununla bağlı şəhər memarına göstəriş vermişik. İlkin olaraq 10 yerdə düzəldiləcək, sonradan bu cür dayanacaqların sayı artırılacaq, artıq şəhərdə müasir taksi şəbəkəsi və xüsusi taksi parklarının yaradılması planlaşdırılır. Sakinlərin rahatlığını təmin etmək üçün "Peugeot” markalı taksilərin gətirilməsi nəzərdə tutulub.
2016-cı ilin ilk ayıdır hələ də Gəncədə nə taksi dayanacaqları nə də ki, "Peugeot” markalı taksilər var.
"GƏNCƏNİN ƏHALİSİ 3 DƏFƏ ARTIRILACAQ"

 – 19 aprel 2014-cü il tarixində Gəncə İcra Hakimiyyətinin başçısı Elmar Vəliyev şəhərin əhalisini 1 milyona çatdıracağını deməsinə baxmayaraq şəhər əhalisi günü gündən daha da azalır. 
Və bu gün Elmar Vəliyevin yarıtmaz fəaliyyəti nəticəsində Gəncə artıq ölkənin 2-ci böyük şəhəri statusunu Sumqayıta verib..
"GƏNCƏDƏ XOCALI ABİDƏSİ UCALDILACAQ"

– 26 fevral 2014-cü il tarixdə Gəncənin Hacıkənd qəsəbəsində məskunlaşan Xocalıdan olan məcburi köçkünlərlə görüşündə bildirmişdir ki Gəncənin yaxınlığında Xocalıdan olan məcburi köçkünlər üçün şəhərcik salınır və şəhərcikdə olan parkda Xocalı soyqırımında şəhid olan azərbaycanlıların xatirəsinə ehtiram olaraq abidə ucaldılacaq. 
Verilən vəddən 2 il keçməsinə baxmayaraq Xocalı Abidəsi yoxdur.
"GƏNCƏDƏ FİBEROPTİK KABEL İSTEHSALI" üzrə zavod fəaliyyətə başlayacaq

 – 23 may 2013-cü il. 2013-cü il I rübünün yekunlarına həsr edilən şəhər fəallarının toplantısında Gəncə şəhər İcra Hakimiyyətinin başçısı Elmar Vəliyev qeyd edib ki, Azərbaycanda yüksək keyfiyyətli fiberoptik kabel istehsal edən, dəyəri 100 mln. manat olan zavodun tikintisi planlaşdırılır. Onun sözlərinə görə, ölkə başçısı İlham Əliyev bu zavodun məhz Gəncədə tikilməsini məsləhət görüb. İcra başçısı qeyd edib ki, Gəncə artıq sənaye şöhrətini geri qaytarır: "Yeni tikiləcək zavodda yüzlərlə şəhər sakini işləyəcək”. 
Həmin vaxtdan 3 il keçməsinə baxmayaraq belə bir zavodun inşasından əsər əlamət yoxdur.
"GƏNCƏDƏ YENİ FƏXRİ XİYABAN YARADILACAQ"

- 21 iyul 2014-cü ildə Gəncə şəhər İcra Hakimiyyətinin başçısı Elmar Vəliyevin verdiyi məlumata görə şəhərdə Fəxri Xiyabanın yaradılması ilə bağlı sərəncam verilib. 2016-cı il olmasına baxmayaraq Elmar Vəliyevin bu vədi də yalan çıxmışdır.
"GƏNCƏDƏ HƏRBİ HİSSƏLƏRİN YERİNDƏ PARKLAR SALINACAQ"

– 20 may 2014-cü il tarixində Gəncə şəhər İcra Hakimiyyətinin başçısı Elmar Vəliyev həmin ilin I rübunun yekunlarına həsr edilən iclasda bildirib ki, ölkə prezidentinin tapşırığı ilə şəhərin ətrafında hərbi hissələr üçün yeni binalar tikiləcək. Və Gəncənin mərkəzində olan hissələr ora köçürüləcək. 
2017-cı il olmasına baxmayaraq bu istiqamətdə də heç bir irəliləyiş yoxdur. 
Nə park var nə köçürülən hərbi hissələr. Boşaldılan bir neçə hərbi Hissə əraziləri də sot-sot satılaraq talanıb, vəssalam!!!
GƏNCƏNİN MƏRKƏZİNDƏ ANALOQU OLMAYAN YAŞAYIŞ KOMPLEKSİ TİKİLİR"
2014-cü ildə bu barədə Gəncə şəhər İcra Hakimiyyətinin başçısı Elmar Vəliyev məlumat verib. O, qeyd edib ki, bu ilin sonuna kimi şəhərdən 6 hərbi hissə başqa əraziyə köçürüləcək və onların yerində şəhərin baş planına uyğun tikililər ucaldılacaq.
"Gəncənin mərkəzindən köçürülən hərbi hissələrin əraziləri Gəncə şəhər İcra Hakimiyyətinin balansına verilir. 
Artıq hərbi hospital köçürülüb və onun yerləşdiyi ərazidə yeni müasir yaşayış kompleksi tikiləcək. Kompleksdə respublikada analoqu olmayan binalar ucaldılacaq. Burada ticarət mərkəzi, uşaq baxçası, poliklinika və s xidmətlərdə yer alacaq.
2014-cü ilin yay aylarında həmin ərazidə yerləşən bir neçə XIX əsrin gözəl tarixi bina yerlə yeksan edilsə də, bu günə kimi yerində heç bir iş aparılmayıb. Aldığımız məlumata görə Türkiyənin tikinti şirkəti bu layihədən tam imtina edib.
Yuxarıda sadaladığımız yalançı vədlərin ancaq kiçik bir hissəsidir.
İllərdir "gələn il" tikinti işlərinin yekunlaşacağı bildirilən işlərin sayı isə ümumiyyətlə bilinmir.
Şəhər küçələrinin asfaltlanması, Gəncə Beynəlxalq Avtovağzalı və onlarla digər tikinti layihələrinin də inşası illərdir yekunlaşmaq bilmir ki, bilmir...

Reallaşmış layihələrin böyük əksəriyyəti yerli iş adamlarının, idarə və müəssisə rəhbərlərinin maddi dəstəyilə baş tutub, büdcə vəsaitlərinin dəqiqliklə xərclənməməsi də sirr deyil. "Əlinin papağını Vəlinin başına" qoymaqla və hətta adi büdcə işçilərinin maaşlarından pul tutmaqla birtəhər başa çatdırmış Elmar Vəliyev görəsən indiki böhran vəziyyətində necə edəcək, hansı addımlar atacaq? İndi, Gəncəyə rəhbərlik etməkdə olan Elmar Vəliyevə ünvanlanan çoxlu cavabsız suallar var. Hamını düşündürən ilk sual isə budur. Görəsən o, bu postda daha neçə il qalacaq?

Ümidvarıq ki, Elmar Vəliyev işlərində yeni dönüş yaradacaq.

Osman Nərimanoğlu

Demokratik.Az