Demokratik TV
Daha iki quda təhlükədə - “Ancaq villada görüşürlər...”
Sabiq rabitə naziri bağından gizli şəkildə hara gedir?; Əli Abbasov bağından kənara ancaq istintaqa çağırılanda çıxır; Beynəlxalq Banka olan 104 milyon borcu səbəbindən bir neçə dəfə dindirilən Etibar Pirverdiyevdən indi həm də qudası barədə soruşurlar; Misir Mərdanovun qardaşı Rabitə Nazirliyindən niyə çıxarıldı?
Noyabrın 12-də prezident İlham Əliyevin sərəncamı ilə işdən çıxarılan rabitə və yüksək texnologiyalar naziri Əli Abbasov istintaqa cəlb olunub. Hüquq-mühafizə orqanlarına yaxın mənbəmiz deyib ki, sabiq nazir haqda "heç yerə getməmək” barədə qətimkan tədbiri seçilib. Məlumata görə, onu nazirlikdəki korrupsiya faktları və MTN-in həyata keçirdiyi gizli dinləmələrlə bağlı dindirirlər.
Xidməti avtomobilini təhvil verən sabiq nazir istintaqa ailəsinin istifadə etdiyi şəxsi maşınla və maksimim gizlilik şəraitində gedir. Xəbərə görə, onu Şüvəlanda yerləşən bağ evində ziyarət edənlər sırasında indi yalnız bir nəfər iqtidar adamı var: "Azərenerji” ASC-nin sədri Etibar Pirverdiyev. Qeyd edək ki, bir müddət əvvəl səlahiyyətləri xeyli azaldılan E.Pirverdiyev sabiq nazirlə qudadır. Belə ki, Əli Abbasovun oğlu Eldar Abbasov ötən il Etibar Pirverdiyevin qızı ilə ailə həyatı qurub. Yeri gəlmişkən, E.Pirverdiyevin rəhbərlik etdiyi qurumun Beynəlxalq Banka olan 104 milyon borcu səbəbindən istintaqa çağırıldığı məlumdur. Amma indi belə xəbərlərdə var ki, onu həm də qudası ilə bağlı dindirirlər.
Ondan qudası ilə bağlı nə soruşduqları bəlli deyil. Ə.Abbasovun 10-dək ən yaxın kadrı hazırda korrupsiya ittihamı ilə həbsdədir və demək olar ki, bütün mənimsəmə sənədlərində sabiq nazirin imzası və ya razılığı var. Ə.Abbasovun Azərbaycan Dövlət İqtisad Universitetində rəhbəri olduğu kafedra müdiri vəzifəsindən də uzaqlaşdırıldığı deyilir. Onun uzun illərdir rəhbərlik etdiyi dünya iqtisadiyyatında informasiya texnologiyaları kafedrasındakı yeri hələ ki vakant saxlanılıb, amma baş verən rüsvayçı hadisələrdən sonra onun müəllim kimi auditoriyaya girməsi mümkünsüz görünür.
Noyabrın 25-də rabitə və yüksək texnologiyalar nazirinin birinci müavini təyin edilən və eyni zamanda, nazir vəzifəsini icra edən Ramin Quluzadə isə Ə.Abbasovun yaxın kadrlarını da nazirlikdən təmizləyir. İddiaya görə, nazirlikdə korrupsiya faktlarının miqyası o qədər böyükdür ki, yeni həbslər də qaçılmazdır. Bu səbəbdən də R.Quluzadə indidən şübhəli reputasiyalıları nazirlikdən uzaqlaşdırır. İşdən çıxarılanlar arasında bir məşhur soyad da var - Mərdanov. Nazirliyin həbsdə olan Aparat rəhbəri Vidadi Zeynalovun müavini İlham Mərdanovun iki gün əvvəl vəzifəsindən azad olunması barədə sərəncam imzalanıb (azpolitika).

İlham Mərdanov keçmiş təhsil naziri Misir Mərdanovun qardaşıdır. O, MTN işi çərçivəsində həbs olunan Rabitə və Yüksək Texnologiyalar Nazirliyinin keçmiş aparat rəhbəri Vidadi Zeynalovun yaxın ətrafına daxil olub. Bəzi məlumatlara görə, İ.Mərdanov qanunsuzluqlara göz yumması müqabilində hər ay Vidadi Zeynalovdan 5 min manat "paket” alıb.
Onun tezliklə həbs və ya işdən kənarlaşdırılacağı barədə dəqiq informasiya verilməsə də, həbsə atılan Vidadi Zeynalovla yaxın münasibətlərdə olduğu vurğulanır. Elə buna görə də aparat rəhbərinin müavininin səksəkə içərisində son aqibətini gözlədiyi bildirilir. "Yeni Müsavat”ın məlumatına görə, V.Zeynalov əslində Əli Abbasovun deyil, Misir Mərdanovun kadrıdır.


Nazir əvəzi İlham Mərdanovla ərizəsi alınanlar sırasında nazirliyin Elektron İdarəçiliyin İnkişafı şöbəsinin rəisi Elnur Aslanov, İnfrastrukturun inkişafı şöbəsinin rəisi, mərhum Tofiq İsmayılovun oğlu Mirheydər İsmayılov kimi tanınmışların, həmçinin ölkədə nüfuz sahibi olan digər yüksək çinli vəzifəli şəxslərin yaxın qohumlarının adları da var. Strateq.az saytı yazır ki, Ramin Quluzadə yaxın günlərdə kimlərlə işləyəcəyi haqda qəti qərarını verəcək. Çox güman ki, nazirliyin 11 şöbəsi və birbaşa aparata tabe olan bir neçə qurumun müdirlərinin əksəriyyəti ilə yollarını ayıracaq.
Xəbər xidməti
