Xəbər lenti
Bütün xəbərlər

SOS! Gəncədə qanunsuz küçə bazarları koronavirus yaya bilər!

  • 14 mar 2020, 14:39
"Demokratik.Az" saytı koronavirus xofu yaşayan Gəncə sakinləri tərəfindən maraqlı və haqlı şikayət alıb.
Sakinlər bildirir ki, şəhərin müxtəlif yerlərində, küçələrin ortasında mövcud olan süni bazarlar son günlər bütün dünyanın qorxulu epidemiyasına dönüşən koronavirus pandemiyasının Gəncədə sürətlə yayılmasına səbəb ola bilər.
Əsasən, əhalinin sıx yerlərində müşahidə edilən hal küçələrdə, avtobus dayanaclarında, iri ticarət-iaşə obyektlərinin önündə, və hətta piyada səkilərində lap tuğyan edir. 
Sakinlərin saytımıza bildirdiyinə görə, belə qanunsuz küçə ticarətçilərinin satdıqları əşyalar, paltarlar, göy-göyərti, qutab-kətə, müxtəlif növ meyvə-tərəvəz mütamadi şəkildə havada uçuşan mikroblu toz-torpaqla, yüzlərlə müştəri ilə açıq təmasdadır. Elə buna görə də, yayıla biləcəyi təhlükəsini yaşadığımız koronavirusun həmin mallar və qida məhsulları vasitəsilə adamlara yoluxaraq evlərə girmək risqi olduqca böyükdür.
Şəhərin "keçəllər" adlanan küçəsində son illərə dayanan acıanacaqlı durum indi də həmişəki ahəngindədir. Burada piyada səkiləri işbazların istəyilə tamamilə tutulub, maşınların hərəkəti çətinləşib, insanların alış-verişə axını nəzarətsiz kütləvi toplanış yaradıb. 
Sakinlər onu da bildirirlər ki, Gəncədə deyilən ictimai qanunsuzluğu təkcə fiziki şəxslər deyil, "OBA MARKETLƏR ŞƏBƏKƏSİ" də həyata keçirir.Belə ki, Gəncədə mövcud "OBA" mağazalarının əksəriyyətinin önündə açıq meyvə-tərəvəz bazarları fəaliyyətdədir. Şəhərin Şah İsmayıl Xətai prospektində yaşayan şikayətçi uzun müddətdir ki, "OBA" yetkililərinə bu barədə etiraz etməkdən bezdiklərini bildirir. Amma tədbir görülmür.
Elə Ş.İ.Xətaidə düz avtodayanacaqda yerə sərili satışda olan meyvə-tərəvəz "bazarı" da göz oxşayır. Sərnişinlərin və görənlərin hüzurunu pozur, narazılıq doğurur. Sahibkar zirzəmi mağazasını unudub satdığı nə varsa səkiyə yığmağı vacib sayıb.
Şəhərin köhnə Yevlax Avtovağzalı (N.Nərimanov parkı ilə üzbəüz) ərazisində də əl arabasında kimlərinsə alış-veriş etdiyini görmək olar.
Küçədə qutab və kətə satan, dönər qızardanlar da tapılır.
Güman ki, sanitar-gigiyenik norma və qaydaları saymayan, qazanc məqsədilə belə xaotik küçə bazarlarına yerli polis orqanı tərəfindən xüsusi şərait yaradılır ki, inzibati cəzasızlıq öz hökmünü ağır fəsadlara aparır.  
"Demokratik.Az" xatırladır ki, ayın əvvəlindən Nazirlər Kabineti yanında operativ qərargah "sosial izolyasiya" tədbirləri həyata keçirməkdədir. Bu barədə əhali tez-tez məlumatlandırılır və ölkə vətəndaşlarının koronavirusa yoluxmaması istiqamətində zəruri prafilaktik tədbirlər görülür. 
Bu gecədən etibarən ölkə boyunca bütün kütləvi tədbirlər, o cümlədən mədəni-idman tədbirləri təxirə salınıb, təyin olunmuş tədbirlərin tarixi belə dəyişdirilir.
Dəfn mərasimləri istisna olmaqla, qapalı məkanlarda keçirilən yas yığıncaqlarına qadağa qoyulur. Eynilə, 14 və 15 mart tarixlərinə əvvəlcədən təyin olunmuş toy mərasimləri istisna olmaqla bütün toy məclislərinin keçirilməsinə də icazə verilmir.
Restoran və kafelərin işi axşam saat 9-dan sonra durdurulur.
Ölkə üzrə fəaliyyət göstərən alış-veriş mərkəzlərinin fəaliyyətinin müvafiq dövlət strukturları tərəfindən açıqlanacaq qaydalara riayət olunaraq həyata keçirilməsi mütləqiləşir.
Gəncə şəhər rəhbərliyini və məsul dövlət qurumlarını qanunla onsuz da qadağan olunan küçə ticarətinin qarşısının alınması üçün tədbirlər görməyə çağırırıq. Bari, koronavirus təhlükəsinə və Nazirlər Kabinetinin tövsiyyə və tapşırıqlarına görə Gəncədə təcili əməli tədbirlərin həyata keçiriləcəyinə ümidvarıq.
Gəncə sakinlərini virus risqi daşıyan özbaşına küçə bazarlarında alış-veriş etməməyə səsləyirik... 
Demokratik.Az
Oxşar xəbərlər