Milyarder Əhmədov Tatyanaya yarım milyardı verməyəcək

  • 26 yan 2019, 10:53

İnterpol da işə qarışdı, milyonların saxtakarlıqla talanması araşdırılır

Adı "Forbes” jurnalının milyarderlər siyahısında yer alan azərbaycanlı biznesmenlərdən biri də Fərhad Əhmədovdur.

Biznesdə böyük uğurlar qazanan Fərhad Əhmədov ailə baxımdan bəxti gətirmişlərdən deyil. Həyat yoldaşı - 41 yaşlı Tatyana Əhmədova onu qoyub qaçıb. Ardından Tatyana Əhmədova Fərhad Əhmədova qarşı iddia qaldırıb, London məhkəməsində sabiq ərinə qarşı yarım milyard dollarlıq təzminat qərarı çıxarılmasına nail olub...

(əvvəli ötən sayımızda)

...Fərhad Əhmədov bildirib ki, London məhkəməsinin hakimi onun keçmiş arvadının məkrli planını reallaşdırıb. Hansı ki, qadın 10 il boyu məkrlə gözləyib ki, nə zaman F.Əhmədovun qazandığı pullar onun hesabına oturacaq. O,  bu pulların üzərinə öz pəncəsini qoymağı qərara alıb. Məhkəmə nəzərə almayıb ki, F.Əhmədov bu pulları Tatyana ilə nikahı pozulandan sonra qazanıb,  5 uşaq atasıdır, o cümlədən başqa nigahdan olan 3 uşağını böyüdür. Xeyriyyəçiliklə məşğuldur, Rusiyada və Azərbaycanda bir çox insanlar onun dəstəyinə ümidlidir.

Biznesmen bəyan edib: "Mən ingilis hüquq sisteminə öz hörmətimi ifadə etməklə bərabər bəyan edirəm ki, məhkəmənin bu şübhəli, gecikmiş və qalmaqallı qərarı dünyada çoxlarını təəcübləndirəcək, onların ingilis hüquq sisteminə və ədalətinə inanımını sarsıdacaq”. Bəyanatda deyilir ki, London məhkəməsinin qərarı həm də siyasi motivlidir, biznesmenin pullarının yarısını təzminat adı altında əslində Britaniya yuridiksiyası altında saxlamağa, nəticədə bu pulların Britaniya iqtisadiyyatına xidmət etməsinə hesablanıb.

 

Moskva Şəhər Məhkəməsi azərbaycanlı milyarder Fərhad Əhmədovun London məhkəməsinin qərarı ilə bağlı verdiyi apelyasiya şikayətini rədd edib. Əhmədovun kifayət qədər və etibarlı sübutlar təqdim etmədiyi bildirilib.

"Kassasiya şikayəti veriləcək. Fərhad Əhmədov Ali Məhkəməyə qədər gedib çıxmaq niyyətindədir”, - vəkil, biznesmenİrina Şeqlova bildirib.

"Moskva Şəhər Məhkəməsi, demək olar ki, heç bir müzakirə olmadan Zyuzinsky Məhkəməsinin qərarını qüvvədə saxladı. Növbəti instansiyada ədalətli qərara nail olacağıq”. Bunu isə Fərhad Əhmədov özü "RBK”ya açıqlamasında söyləyib.

London məhkəməsinin qərarına əsasən, Tatyana Əhmədovaya ödənilməli olan təzminatın siyahısına Fransa və Londondakı daşınmaz əmlak, 350 min dollar dəyərindəki "Aston Martin” avtomobili, 90,5 milyon dollar məbləğindəki müasir incəsənət əsərlərinin kolleksiyası, eləcə də 5 ədəd "Holland and Holland” tüfəngi daxildir. Xatırladaq ki, 1993-cü ildə ailə quran cütlük Londonda özlərinə ev alıb, daha sonra onların ilk oğlu, 3 il sonra ikinci oğulları dünyaya gəlib. Tatyana Əhmədova məhkəmə qərarına görə keçmiş ərindən 585 milyon dollar almalıdır. Amma Fərhad Əhmədov London Məhkəməsinin qərarını icra etməmək, qüvvədən salmaq üçün çalışmaqdadır. Tatyana Əhmədovanın vəkilləri də qərarın icrası üçün əlindən gələni edirlər.

Fərhad Əhmədovun "Luna” yaxtasında dünya səyahətinə çıxmasını eşidər-eşitməz hərəkətə keçiblər. Nəticədə məhkəmə "Luna”nın üzərinə həbs qoyub. Fərhad Əhmədovun vəkilləri "Luna” yaxtasını geri almaq üçün Dubayda şəriət məhkəməsinə müraciət ediblər. Fərhad Əhmədovun vəkillərinin işi Britaniya məhkəməsindən Dubaydakı şəriət məhkəməsinə keçirmək istəmələri milyarderin keçmiş həyat yoldaşı Tatyananı qəzəbləndirib. O, buna görə ilk dəfə jurnalistlərə açıqlama verib: "Görünən odur ki, Fərhad əslən Azərbaycandan olduğu üçün müsəlmandır. Amma nikah müddətində heç vaxt onu dizini yerə qoyub namaz qılan, ibadət edən görməmişəm. Məscidə isə o yalnız turist kimi daxil olub”.

Onun bu açıqlamasına Fərhad Əhmədovun qardaşı Fərəc Əhmədov münasibət bildirmişdi. Modern.az saytına açıqlamasında demişdi ki, ailədə 3 qardaş olublar: "Hamımız da müsəlman qaydasında böyümüşük. Fərhad Əhmədov xaricdə yaşasa da, müsəlman olduğunu  danmayıb. Düzdür, sovet dövründə böyüyüb, təhsil alıb. Müsəlman adətlərinə görə, namaz qılıb oruc tutmasa da, İslam dininə, xalqına bağlı adamdır. Sadəcə, keçmiş həyat yoldaşı olan Tatyana  "Fərhad Əhmədov məscidə turist kimi gedib" deməklə niyyətini ortaya qoymuş olub. Güman ki, məsələnin məğzi başqadır. Çünki qardaşımın vəkillərinin işi Britaniya məhkəməsindən Dubay şəriət məhkəməsinə köçüb. Dubay da müsəlman ölkəsidir. Tatyana da Fərhad Əhmədovu müsəlman şeyxlərin gözündən salmaq üçün belə fikirlər səsləndirir. Hər halda belə düşünürəm".

Tatyana Əhmədova rekord məbləğdə - 450 milyon funt sterlinqi əlinə almaq üçün 2 ildən artıqdır ki, çabalayır. Bu isə sənəd üzərində 1,4 milyard dollar sərvətə malik Fərhad Əhmədovun varidatının 40 faizini təşkil edir.

Tatyana Əhmədova son açıqlamasında keçmiş ərinin ona hələ ki, 1 qəpik də ödəmədiyini deyib. Fərhad Əhmədov da məhkəmə qərarını kağız parçası adlandırıb və sərvətinin 40 faizini həyat yoldaşına vermək niyyətində olmadığını söyləyib.

2019-cu il yanvarın 21-də məlum olub ki, Beynəlxalq Polis Təşkilatı - İnterpol Fərhad Əhmədov və vəkillərinin  keçmiş arvadı Tatyana Əhmədovanın sərvətini saxtakarlıq yolu ilə mənimsəməsi faktını araşdırır. Bu barədə "The Guardian” nəşri məlumat yazıb. Bildirilir ki, milyarder sərvətinin böyük bir hissəsini keçmiş həyat yoldaşı T.Əhmədovaya köçürmə öhdəliklərini aradan qaldırmaq üçün yeni yollar axtarır. Milyarder özü də "İnterpol”un Rusiya nümayəndəliyinə müraciət edərək, məsələnin araşdırılmasını istəyib. Hazırda "İnterpol” Əhmədov və vəkillərinin arvadının sərvətini ələ keçirmək üçün saxtakarlıq edib-etmədiklərini araşdırır. /Y.M/

Oxşar xəbərlər