Gəncədə Rəsulzadənin büstü önündəki qərənfillər oğurlandı - FOTOFAKT

Gəncədə biabırçı hadisə baş verib. Rəsulzadənin anadan olmasının 138-ci ildönümü ilə əlaqədar cümhuyiyyət banisinin büstü önünə ziyarətçilər tərəfindən düzülmüş qərənfillərin bir çoxu oğurlanıb.

Demokratik.Az bildirir ki, bu iddia ilə jurnalist Osman Nərimanoğlu çıxış edib.
"Mərhum liderimiz Məhəmməd Əmin Rəsulzadənin doğum günü hər il Gəncədə də sayğı ilə anılır. Bugün axşam saatlarında bir neçə həmkarımızla biz də tarixi şəxsiyyətin Dəmiryolu vağzalındakı büstünə qərənfillər qoyub, görkəmli dövlət qurucusunun əziz xatirəsini andıq. Bir neçə xatirə şəkli də çəkdirib Rəsulzadə ilə vidalaşdıq. Maraqlıdır ki, bizdən sonra Rəsulzadənin hüzuruna qoyulmuş qərənfillərin yarıdan çoxu naməlum şəraitdə oğurlanıb. Dediyimin sübutu üçün Məhəmməd Əminin büstü önünə bizdən sonra "GƏNCƏLİLƏR" adından qoyulmuş əklilin fotoşəklinə nəzər salmaq, baxmaq yetərlidir".

Jurnalist daha sonra üzülərək əlavə edib: "Təəssüf ki, Rəsulzadənin dövlətçilik ideyalarını dərk etmək, onun siyasi həyat yoluna varmaq əvəzinə, kimlərinsə onun büstündəki biri 70 qəpik olan qərənfilləri oğurlamağa ehtiyacı var..."

Demokratik.Az