Quba-Xaçmaz yolundakı "CLUB 480" əxlaqsızlıq yuvası kimi fəaliyyətdədir - ŞİKAYƏT

Demokratik.Az saytının elektron poçt ünvanına Quba rayonundan fərdi müraciət var. Babayev Əliqulu Hacıəhməd oğlunun adından yazılan şikayətdə Quba-Xaçmaz yolunun üzərində yerləşən “CLUB-480” adı ilə tanınan obyektin əxlaqsızlıq yuvası kimi fəaliyyət göstərdiyi iddia edilir.

"Demokratik.Az"-a yazılan şikayətin mahiyyətində həmin restoranın yaxınlığında yaşıyan insanların da buna öz etirazlarının bildirilməsi, lakin, problemin həll edilməməsi öz əksini tapır.

Məlumata görə, həmin kafenin yanında park var və məkanın xoşagəlməz fəaliyyəti insanların parkda istirahət etmək istəklərini əllərindən alır. Eyni zamanda klubun ətrafında yaşayış binaları da var ki, şikayətçi də daxil olmaqla ətrafda yaşayan sakinlər “CLUB-480”-in fəaliyyətindən artıq beziblər.

Əliqulu Babayevin bildirdiyinə görə, həmin klubu Ramin adlı şəxs işlədir və klubda 10-a yaxın qız müştərilərə xidmət edir. İddialara inansaq, bar sahibi heç kimi saymır, əksinə bu cür iradlara görə hər kəsi təhdid və təhqir edir.

İnanırıq ki, polis sözügedən “CLUB-480” adlı obyektin fəaliyyətini dərindən araşdıracaq.
Demokratik.Az