Hüquq müdafiəçiləri Fuad Ələsgərovla görüşdülər

  • 13 mart 2019, 20:53

İnsan Haqları üzrə İşçi Qrupunun üzvləri, tanınmış hüquq müdafiəçiləri Novella Cəfəroğlu, Səidə Qocamanlı və Səadət Bənənyarlı martın 13-də Azərbaycan prezidentinin hüquq mühafizə orqanları ilə iş və hərbi məsələlər üzrə köməkçisi-şöbə müdiri, Azərbaycan Respublikasının Prezidenti yanında Əfv Məsələləri Komissiyasının üzvü Fuad Ələsgərovla görüşüblər.

Bu barədə "Yeni Müsavat”a Novella Cəfəroğlu məlumat verib. Hüquq müdafiəçisinin sözlərinə görə, Fuad Ələsgərovla görüşdə çoxsaylı məsələlərlə bağlı ətraflı söhbət olub: "Həm siyasi məhbuslar məsələsi, həm QHT-lərin durumu, həm Qarabağ məsələsi ilə bağlı, bir sözlə çox məsələlər ətrafında söhbət etdik. Fuad müəllim bizi ətraflı dinlədi, fikir mübadiləsi apardıq”. 

Prezidentin əfv sərəncamını imzalayacağını gözlədiklərini deyən Novella Cəfəroğlu qeyd etdi ki, məhbuslar siyahısını Əfv Komissiyasına təqdim ediblər və siyahının hamısına baxılıb. Konkret kimlərin əfv siyahısında olacağını isə cənab prezidentin əfv sərəncamı veriləndə ictimaiyyət biləcək.

N.Cəfəroğlu vurğuladı ki, əfv sərəncamından sonra hüquq müdafiəçiləri olaraq mətbuat konfransı keçirməyi planlaşdırıblar.

Oxşar xəbərlər