Xəbər lenti
Bütün xəbərlər

Paytaxtda parkomatlar ləğv edilir – VİDEO

  • 25 avq 2018, 09:42

Bakı Nəqliyyat Agentliyi paytaxtda parklama yerləri və parkomatlarla bağlı yeni layihə hazırlayır.ARB TV xəbər verir ki, köhnə parkomatların söküləcəyi və əvəzinə yeni sistemin tətbiq olunacağı gözlənilir.
2014-cü ildə paytaxtın 60-dan çox küçə və prospektinə parkomatlar düzüldü, onlardan bəziləri isə lazım olmayan yerlərdə quraşdırıldı. Daha sonra müəyyən edildi ki, artıq parkomatlara ehtiyac yoxdur.
Tıxac probleminin həlli və bu sahədə pərakəndəliyi aradan qaldırmaq üçün Bakıda 500-dən çox parkomat quruldu. Bu ödəmə aparatlarının hər birinin alınmasına, gətirilməsinə və küçələrdə yerləşdirilməsinə dövlət büdcəsindən kifayət qədər pul və resurs xərcləndi. 3 il sonra isə parkomatlar əhəmiyyətsiz dirək kimi avtomobillərə tamaşa etməyə başladı.

Sakin: "Binamın qabağına parkomat qoyublar. Hündür mərtəbəli yeni binadır. Gündə 20-30 dəfə girirəm ora. Hər dəfə də məcburam ora pul ödəyim”.

Mütəxəssislər deyirlər ki, parkomatların quraşdırılmasında məqsəd ödənişi elektron müstəvidə aparmaq idi. Bunun üçün bu aparatlar mərkəzi bazaya inteqrasiya olunmalı, dövlət yol polisi isə nəzarət etməli idi. Amma bu sistem tam qurulmadan yeni çətinliklər ortaya çıxdı.

Elməddin Muradlı – Ekspert: "O elektron sistemi qurmaq üçün parkomatlar hamısı ləğv edilməlidir. Bu günkü gün o aparatlar lazımsız əşyadır. Yəni ona əlavə müdaxilə edərək elektron cihaz yerləşdirib bugünkü qanunun tələbi çərçivəsinə gətirmək qeyri-mümkündür”.

Deməli böyük əziyyət və xərclə ərsəyə gələn bu qurğulardan artıq əlimizi üzməliyik. Parkomatları isə əlində post terminal olan işçilər əvəzləyib. Bu adamlardan terminalın iş prinsipini öyrənmək cəhdimiz isə bizdən xeyli vaxt aldı.

Mütəxəssislər isə deyirlər ki, bu pos terminallar da mərkəzi bazaya inteqrasiya olunmalıdır. Yalnız bu halda şəffaflığı təmin etmək olar.

Əllərində pos terminalla "çek çıxaranlar” heç bir avtomobilin üzərinə çek qoymurlar.

Elməddin Muradlı – Ekspert: "O cihazlar qanunla Dövlət Yol Polisinin mərkəzi məlumat sisteminə inteqrasiya olunmalıdır. Məlumat olmalıdır ki, bu maşın bu parkomata daxil oldu və bu qədər ödəniş etdi. O ödənişin də müddəti bu qədərdir misal üçün. Ödənişin müddətindən keçən kimi avtomatik olaraq ona elektron protokol tərtib olunmalıdır. O dayanacaqlardakı nəzarətçilərin müdaxiləsi olmadan”.

Məsələ ilə əlaqədar Bakı Şəhər İcra Hakimiyyəti ilə əlaqə saxlamaq istəsək də, qurum həmişəki kimi susmağa üstünlük verdi. Şəhərin gələcək parklama planını hazırlayan qurum – "Bakı Nəqliyyat Agentliyi”ndənsə bildirdilər ki, yaxın vaxtlarda bu sahə ilə bağlı hazırlanan layihə açıqlanacaq. Yeni sistem bu sahədə yaranan problemlərin aradan qaldırılmasına hesablanıb.

Oxşar xəbərlər