Gəncəli kriminal avtoritet 17 il həbs cəzası alıb

Kriminal aləmdə 'Gəncəli Firdovsi' kimi tanınan Firdovsi Mustafayevin cinayət işi üzrə məhkəməsi başa çatıb.

Demokratik.Az xəbər verir ki, lent.az-ın məlumatına görə, Gəncə Ağır Cinayətlər Məhkəməsində hakim Faiq Mahmudovun sədrliyi ilə keçirilən prosesdə hökm oxunub. Hakimlər kollegiyasının hökmünə əsasən, Firdovsi Mustafayev 17 il müddətinə azadlıqdan məhrum edilib. Hökmlə razılaşmayan 'Gəncəli Firdovsi' Apellyasiya şikayəti verib.

Bir neçə gün əvvəl isə Firdovsi Mustafayev Gəncədə yerləşən Penitensiar Xidmətin İstintaq Təcridxanasından Bakıda yerləşən vərəmli məhkumların saxlandığı İxtisaslaşdırılmış Müalicə Müəssisəsinə gətirilib.

Qeyd edək ki, 'Gəncəli Firdovsi' ötən il Sankt- Peterburqda həbs edilərək, Azərbaycana ekstradisiya olunub. O, 2015-ci il avqustun 3-də Gəncə şəhəri Nizami küçəsində 3 şəriki ilə birlikdə kütləvi davada iştirakda günahlandırılır. Dava nəticəsində Gəncə sakini, 1985-ci il təvəllüdlü Niyaməddin Zeynalov bıçaqla qətlə yetirilib, 1986-cı il təvəllüdlü Cəlal Abdullayev isə qarın nahiyəsindən bıçaq yarası alıb.

Hadisədən bir müddət sonra isə Firdovsi Mustafayev Rusiyaya qaçmağı bacarmışdı.

Xatırladaq ki, Firdovsi Mustafayev ömürlük həbs cəzası almış Elşad Mustafayevin oğludur. Eyni zamanda, onun əmisi Mustafayev Məqsəd Teyyub oğlu da ömürlük həbs cəzasına məhkum olunub. Onların hər ikisi hazırda Qobustan qapalı həbsxanasında saxlanılırlar.

Mustafayevlər keçmiş Baş Nazir Surət Hüseynovun işi üzrə, həmçinin 1993-cü il Gəncə hadisələri zamanı Samux rayon Prokuroru Şəmşir Əliyevin qətlində günahlandırılaraq həbs ediliblər.

Həmin iş üzrə ittihama görə, 1993-cü ilin iyununda "Surətçilər” dəstəsi Əliyevi öz kabinetindən çıxararaq, qonşuluqdakı məktəbin həyətində güllələyiblər.

Samux rayonunun sabiq icra başçısı Vaqif Hüseynov da həmin işlə bağlı həbs olunmuşdu. O, həbsxanada tutulduğu xəstəlikdən vəfat edib.