Gəncədə yeni çəkilmiş asfalt çökdü - VİDEO

Gəncədə bir neçə gün öncə çəkilmiş keyfiyyətsiz asfalt örtüyü artıq çöküb. Şəhərin Məmmədtağı Cəfərov küçəsində qalınlığı 5 santimetrdən də az olan yeni asfalt yolun bir hissəsi adi qarın yağmasına belə tab gətirməyərək yarğan əmələ gətirib. İşlək yol maşınlar üçün başağrısına çevrilib.
Demokratik.Az-ın məlumatına görə, acı mənzərə Gəncədəki korrupsiyadan, nəzarətsizlik və yerli məmur özbaşınalığından xəbər verir.
Sadə məntiqlə də anlaşılan odur ki, sözügedən küçənin abadlaşdırılması və yenidən qurulması məqsədilə ayrılan pullar da yeyilib. Gəncə İHB-nin belə bərbad yolu təmirdən sonra niyə və necə təhvil aldığı ayrıca araşdırmanın mövzusudur...
Xatırladaq ki, bir neçə gün öncə deputat Naqif Həmzəyev də sözügedən küçənin eyni hissəsini çəkərək "Azərsu Gəncədə yol təsərrüfatına vurduğu ziyanı aradan qaldırmağa başladı.." - deyə sosial şəbəkədə absurd paylaşım etmişdi. Ondan öncə isə MM-də çıxışında "Azərsu"nun bostanına daş ataraq şəhər yollarının bərbad olduğuna diqqət çəkmişdi. Deputat öz çıxışında Gəncə şəhərində həyata keçirilən içməli su və kanalizasiya sistemlərinin yenidən qurulmasında "podratçı-icraçı" şirkət olan “Azəraqrartkinti” ASC-nin varlığını isə dilə gətirməmişdi.
Bu yolun da kanalizasiya və su çəkilişi məqsədilə dəfələrlə qazılmasını unutmaq olmaz... 
Qısa videosüjeti təqdim edirik: