Daha bir şirkət rəhbəri həbs edildi

Korrupsiyaya yol verən daha bir şirkət rəhbəri həbs edilib.
Baş Prokurorluğun mətbuat xidmətindən verilən məlumata görə, Ağcabədi rayonunun Ağabəyli kəndində fəaliyyət göstərən “BMS AQRO” Məhdud Məsuliyyətli Cəmiyyətinin rəhbərliyinin qanunsuz əməlləri nəticəsində Kənd Təsərrüfatı Nazirliyinin “Aqrolizinq” Açıq Səhmdar Cəmiyyətinə külli miqdarda ziyan vurulması barədə Baş prokuror yanında Korrupsiyaya qarşı Mübarizə Baş İdarəsinə daxil olmuş material araşdırılıb.
Araşdirma nəticəsində nəticəsində sözügedən müəssisənin təsisçisi və direktoru Mülhazil Balakişiyevin digər şəxslərlə qabaqcadan əlbir olaraq 5200 baş müxtəlif cins damazlıq xırda buynuzlu mal-qaranın lizinq yolu ilə alınması ilə bağlı 24 iyul 2014-cü il tarixdə “Aqrolizinq” ASC tərəfindən elan edilən tenderin qalibi olduqdan sonra ümumilikdə 3 milyon 692 min avro məbləğində pul vəsaitinin köçürülməsinə nail olub. Daha sonrta müqavilə öhdəliyi üzrə 2 milyon 583 min avro dəyərində olan 3600 baş xırda buynuzlu mal-qaranın gömrük rəsmiləşdirilməsindən keçirməklə ölkəyə gətirərək qeyd olunan müqavilə üzrə “Aqrolizinq” Açıq Səhmdar Cəmiyyəti tərəfindən ona etibar edilən 1 milyon 109 min avronu mənimsədiyi üzə çıxıb. Mülhazil Balakişiyevin barəsində həbs qətimkan tədbiri seçilib.
Hazırda cinayət işi üzrə istintaq-əməliyyat tədbirləri davam etdirilir.