Gülən 15 iyul çevriliş cəhdini Ərdoğanın üzərinə yıxdı

 

 

Demokratik.Az-ın məlumatına görə, Gülən Avropanın bir neçə tanınmış media orqanına Pensilvaniyadakı malikanəsində müsahibə verib.

FETÖ lideri  Ərdoğanın çevriliş cəhdini illər öncə planlaşdırdığını və bunu həyata keçirmək üçün, düzgün vaxt seçdiyini iddia edib. Onun fikirincə, Ərdoğan xoşuna gəlməyən insanları vəzifədən çıxarmaq  və öz hakimiyyətini gücləndirmək üçün, bu addımı atıb.

 

Ərdoğanı keçmişdə dəstəkləməsinin səbəbini açıqlayan Gülən, bunu AKP hökumətinin Avropa Birliyinə üzv olma və insan haqları , demokratiya ilə bağlı vədi ilə əlaqələndirib. Gülən AKP ilə münasibətlərində yaşanan gərginliyi isə "Ərdoğanın intiqamı" adlandırıb. 

"Ərdoğan  istəyirdi ki, onu bütün müsəlmanların lideri elan edək, ümid edirdi ki, dünya miqyasında bunun üçün çalışacayıq. Bu olmayınca da bizə qarşı cəbhə açdı."

 

Uzun illərdir ABŞ-da yaşayan və çevriliş cəhdindən sonra, Türkiyənin tələblərinə baxmayaraq rəsmi Vaşinqtonun onu təhvil verməməsindən danışan Gülən, Birləşmiş Ştatlara qonaqpərvərliyinə görə təşəkkür edib.

Gülən eyni zamanda Avropadan Türkiyə hökumətinə qarşı sərt addımlar atmasını, yoxsa bunun Avropa üçün ciddi fəsadları olacağını da deyib.

 

Qeyd edək ki, 78 yaşlı Gülən 1999-ci ildən bu yana ABŞ-ın Pensilvaniya ştatında yaşayır. Türkiyə, 15 iyul dövlət çevrilişi cəhdindən sonra, haqqında cinayət işi açdığı Güləni ABŞ-dan tələb edir.