Həbsdən şöbəyə getdi, polis yenidən həbs etdi

Abbasov Qorxmaz Tofiq oğlu polis tərəfindən təzyiqə məruz qaldığını və əsassız yerə həbs edildiyini bildirir. Bizimyol.info saytına müraciət edən vətəndaşın sözlərinə görə, əvvəllər məhkum həyatı yaşayıb. "2012-ci ildə azad edildikdən sonra qeydiyyata düşmək üçün Ağdaş rayon Polis Şöbəsinə getdim. Orada məni qeydiyyata almaqdan imtina edtdikləri üçün cinayət-axtarış bölməsinin rəisi ilə aramda mübahisə düşdü. Bundan sonra məni şöbənin müvəqqəti saxlama yerinə saldılar. 14 saatdan sonra isə məhkəməyə apararaq mənə 5 sutka inzibati həbs cəzası verdilər. İnzibati həbs müddəti qurtardıqdan sonra isə şəxsiyyət vəsiqəmi təqdim etdilər və bildirdilər ki, mənə qarşı Cinayət Məcəlləsinin 221.2.2 ( xuliqanlıq ictimai qaydanın qorunması üzrə vəzifəni yerinə yetirən və ya ictimai qaydanın pozulmasının qarşısını alan hakimiyyət nümayəndəsinə müqavimət göstərməklə törədildikdə) maddəsi ilə ittiham verilir və cinayət işi açılır. Barəmdə 4 ay müddətində həbs-qətimkan tədbiri seçildi. Ağdaş RPŞ-nin istintaq qrupu tərəfindən aparılan istintaq başa çatdıqdan sonra cinayət işi məhkəməyə göndərildi. 1 fevral 2013-cü ildə Ağdaş Rayon Məhkəməsi barəmdə 3 il müddətinə azadlıqdan məhrumetmə cəzası ilə bağlı hökm çıxardı. Hökmdən verdiyim şikayəti Şəki Apellyasiya Məhkəməsi təmin etməsə də, Ali Məhkəmə kassasiya şikayətini təmin edərək, işi yenidən apellyasiya instansiyasına göndərdi. Şəki Apellyasiya Məhkəməsi isə hökmü ləğv edərək, işə baxılması üçün yenidən Ağdaş Rayon Məhkəməsinə göndərmişdir. Məhkəmə isə işə bir daha baxaraq, yenidən 3 il müddətinə azadlıqdan məhrumetmə cəzası çıxarıb. Yenidən yuxarı instansiya məhkəmələrinə şikayətlər nəticəsində iş ibtidai araşdırmaya rəhbərlik edən prokurorluğa göndərilib. İstintaq orqanı isə eyni maddə ilə ittiham verərək işi yenidən məhkəmə göndərdi”.

Q.Abbasov bildirir ki, Ağdaş Rayon Məhkəməsində əvvəl işə baxıldığı üçün məhkəməyə verdiyi etiraz Şəki Apellyasiya Məhkəməsi tərəfindən təmin edilib və iş baxılması üşün Göyçay Rayon Məhkəməsinə göndərilib. 

"Göyçay Rayon Məhkəməsinin 2 dekabr 2015-ci il tarixli hökmü ilə cinayət hadisəsi olmadığı əsas götürülərək, mənə elan olunmuş ittiham üzrə bəraət verilmişdir. Həmçinin mənim işimlə bağlı olan polislər barədə araşdırma aparılması üçün məhkəmə tərəfindən xüsusi qərar çıxarılmışdır. Bu qərardan prokurorun verdiyi apellyasiya və kassasiya şikayətləri isə yuxarı instansyalar tərəfindən təmin edilməyib”.

Vətəndaşın bildirdiyinə görə, o, günahsız olaraq, 5 sutka inzibati həbs, 4 ay həbs qətimkan müddəti və 1 il 8 ay azadlıqdan məhrumetmə cəzası alsa da, bu işdə günahkar olanlar cəzalandırılmayıb, əksinə bəzilərinin rütbəsi və vəzifəsi artırılıb. "Həmçinin özümə qarşı təhlükə hiss edirəm. Ağdaşa gedib-gələ bilmirəm, hətta mobil telefon da işlədə bilmirəm. Başqa adamlar vasitəsilə mənə hədə-qorxu gəlirlər» - deyə Q.Abbasov bildirir.

Daxili İşlər Nazirliyi mətbuat xidmətinin şöbə rəisi Orxan Mansurzadə Bizimyol.info saytının bu şikayətlə bağlı sorğusuna cavab verib. DİN rəsmisinin sözlərinə görə Q.Abbasovun özünə təhlükə hiss etməsi və buna görə Ağdaş rayonuna gedə bilməməsi barədə dedikləri əsasssızdır. "Çünki həmin şəxs istədiyi zaman rayona gedib-gəlir. Qorxmaz Abbasovun bu cür məlumatlarla KİV-ə müraciət etməsi özünü sığortalama cəhdidir. Çünki polis tərəfindən onunla maraqlanırlar. Bunun səbəbi isə həmin şəxsin barəsində olan yeni cinayət işi ilə bağlıdır. Belə ki, özünün də etiraf etdiyi kimi əvvəllər məhkumluq həyatı yaşayan bu şəxs həmin proseslər gedən zaman da bekar dayanmayıb, müxtəlif şəxslərdən vasitəçilik etməklə, onların etibardan sui-istifadə etmək yolu ilə onlara məxsus külli-miqdarda əmlakını mənimsəyən hərəkətlərə yol verib. Onun bu hərəkətləri ilə bağlı Ağdaş rayon Nehrəxəlil kənd sakini Hamil Hacıyev rayon prokurorluğuna müraciət edib. Müraciətində qeyd edib ki, Q.Abbasov onun həbsdə olan oğlu Pünhanı azad etdirəcəyi vədi ilə ondan 1700 manat pul alıb. Təbii ki, dediyini etmədiyinə görə vətəndaş dəfələrlə ondan pulunu geri tələb etsə də, qaytarmadığına görə prokurorluğa müraciət edib. Prokurorluqda ötən ayın əvvəllərində Q.Abbasov barəsində Cinayət Məcəlləsinin 178.1 (dələdizluq) maddəsi ilə cinayət işi başlanıb və istintaqın aparılması Ağdaş RPŞ-nin istintaq qrupuna həvalə olunub. Hazırda həmin işlə bağlı istintaq hərəkətləri davam etdirilir, Hamil Hacıyev və bu məsələ ilə bağlı digər şəxslər dindirilib. H.Hacıyev bu iş üzrə zərərçəkmiş şəxs qismində də tanınınb. İndi dindirilmə növbəsi Qorxmaz Abbasovda olsa da, o, istintaq orqanının rəsmi çağırışlarına məhəl qoymur və müxtəlif  bəhanələrlə ifadə verməkdən yayınır. Törətdiyi əməllərə görə cavab verməli olduğunu bildiyinə görə də, KİV-ə guya onu təhlükə gözləməsi barədə məlumatlar verməklə, təhdid olunması barədə rəy yaratmağa çalışır” - deyə Orxan Mansurzadə bildirdi.