Bu gün Milli Şura piket keçirir (ŞƏRH)

Bəxtiyar Sadıqov: "Nə qədər ki, təfəkkürləri yenilənməyib, elə bu şəkildə də qaragüruhçu olacaqlar”

Bu gün Milli Şuranın piketidir. Aksiya Bakı Şəhər İcra Hakimiyyətinin inzibati binası ilə Azərbaycan Dövlət İqtisad Universiteti arasında yerləşən ərazidə keçiriləcək. BŞİH-in razılıq verdiyi piketdə maksimim iştirakçı sayı 50 olmalıdır.

Milli Şuranın 28 sentyabr mitinqi üçün müraciətinə verilən müsbət cavabın ardından Bakının mərkəzində planlaşdırdığı piketə də icazə verilməsi çoxsaylı müzakirələr yaradıb. Aksiyanın təşkilatçıları bu cavabı müsbət dəyərləndirirlər. Amma bununla belə, piketdə təxribat hallarının baş verə biləcəyi ehtimal edilir. Milli Şura funksionerləri və tərəfdarları piketi kənardan müşahidə etmək üçün çoxsaylı insanların olacağını deyirlər. Bu da təxribat ehtimallarını artırmaya bilməz. Hakimiyyət düşərgəsinin təmsilçiləri bir-birinin ardınca uyarıcı çağırışlar edir, əks halda, təxribat hallarının qarşısının qətiyyətlə alınacağını bildirirlər.

Piketin əsas təşkilatçısı sayılan AXCP sədri Əli Kərimli də facebook səhifəsində paylaşdığı statusda aksiyaya icazə verildiyini müsbət dəyərləndirib və ardınca xeyli sayda adamın piketi izləmək istədiyini qeyd edib. AXCP lideri əsas hədəflərinin mitinq hüquqlarını əldə etmək olduğunu söyləyərək, müşahidəçi qismində gələnləri piketçilərlə aralarında məsafə qoymağa çağırıb.

Faktiki olaraq belə mənzərə yaranır ki, AXCP rəhbərliyi piketi qanunsuz, icazəsiz mitinqə çevirmək üçün bəri başdan "əl yeri” qoyub...

YAP-çı deputat, "Azərbaycan” qəzetinin baş redaktoru Bəxtiyar Sadıqov "Yeni Müsavat”a dedi ki, Milli Şura rəhbərliyinin mitinq, piket keçirmək istəkləri məkrli niyyətlərindən xəbər verir: "Müxalifətin aksiya keçirməsi üçün heç bir zərurət yoxdur. Söz demək istəyəndə deyirlər, yazmaq istəyəndə yazırlar, sosial şəbəkələr sərbəstdir. Hətta onlar söyüş belə söyürlər. Azərbaycanda söz və mətbuat azadlığı elə səviyyədədir ki, heç nəyə məhdudiyyət yoxdur. Amma bunlar gördülər ki, ”Məhsul" stadionunda təmir işləri gedir, dərhal mitinq etmək istədilər. Məqsədləri də o idi ki, yer olmasın, haray salsınlar. İndi də piket keçirmək istəyirlər və deyirlər ki, bəs gələn çox olacaq. Piket keçirmək istəyənlərin nə sözləri var ki? Demək istədiklərini yuxarıda qeyd etdiyim vasitələrlə deyirlər. Demək, niyyət oyunlar təşkil etməkdir. Bunun piketdə şahidi olacağıq. Qanunla pozuntu olarsa, polis müdaxilə edəcək və bunlar da hay-haray salacaqlar ki, piketimizə icazə vermədilər. Şivən qoparmağın ustasıdırlar.

Bütün bunların arxasında həm öz mövcudluqlarını önə çəkmək, həm də qrant qoparmaq məqsədi dayanır. Hazırda anti-Azərbaycan şəbəkəsinin əlində bir fürsət yoxdur ki, onu ora-bura hallandırsınlar. Belə şeylərdən istifadə etmək üçün əlaltılarına tapşırıq veriblər ki, gedin piket keçirin. Əminəm ki, bu heç də zərurətdən irəli gəlmir. Burada bir plan var. Bunun piketdə şahidi olacağıq. Azərbaycanın qüdrəti bu gün elədir ki, heç nədən qorxumuz yoxdur. Ölkəmizdə demokratiya, söz və mətbuat azadlığı yüksək səviyyədədir. Dövlətimiz də durmadan inkişaf edir. Hər zaman dediyimiz kimi bizə konstruktiv müxalifət lazımdır. Qrant naminə özgələrinin əlində alət olan, milli maraqları tapdalayan müxalifət bizə lazım deyil. Yəqin ki, zaman bunu zərurətə çevirəcək və bu sahədə də təmizləmə gedəcək. Nəticədə bugünkü Azərbaycana layiq müxalifət formalaşacaq".

YAP təmsilçisi Əli Kərimlinin statusuna da münasibət bildirdi: "Bu status özünü sığortalamaqdan irəli gəlir. O, oyun oynamağı yaxşı bacarır. Öz əlaltılarını sistemli şəkildə aldadan adam əlbəttə ki, məqsədlərinin nə olduğunu deməz. Bu statusu ona görə yazır ki, sonradan bəs demişdim təxribata getməyin, təxribat törədənlər iqtidar adamlarıdır. İndidən ”ayaq yeri" hazırlayır. Ona görə onun səmimiyyətinə inanmıram. Biz kiminsə aksiya keçirib, ətrafına çoxsaylı insanlar toplamasından ehtiyat etmirik. Piketlə guya bunlar nəyəsə nail olacaqlar? Azərbaycan iqtidarı belə şeylərdən çəkinmir. Artıq bu cür mübarizə üsulunun vaxtı çoxdan keçib. Yenilənmək lazımdır. Bunların təfəkkürü 1990-cı ildən üzü bəri keçmir: Ancaq meydana çıxmağı, polislərlə qarşıdurmaya getməyi, sonra da bir iki foto çəkdirməyi, bununla xaricə üz tutmağı bacarırlar. Nə qədər ki, təfəkkürləri yenilənməyib, elə bu şəkildə də qaragüruhçu olacaqlar".