Azərbaycana qarşı xain planın detalları açıqlandı

  • 31 mart 2018, 12:21

Prezidentin köməkçisindən gündəmi silkələyən çıxış; Əli Həsənov ölkəmizi suriyalaşdırmaq istəyən qüvvələri açıq şəkildə göstərdi; "Azərbaycan dövlətçiliyinə qarşı ciddi mübarizə hədəfləri seçilib”

Martın 30-da Beynəlxalq Mətbuat Mərkəzində Mətbuat Şurasının təşkilatçılığı ilə "İnternet mediada və sosial şəbəkələrdə milli-mənəvi dəyərlərin qorunması: neqativ meyllərə qarşı jurnalist həmrəyliyi” mövzusunda keçirilən tədbirdə Prezidentin köməkçisi, Prezident Administrasiyasının ictimai-siyasi şöbəsinin müdiri Əli Həsənov burada detallarla çıxış edərək, olduqca zəngin məlumatlar verib. Açıq şəkildə və rəsmən deyib ki, Azərbaycana, onun iqtidarına və dövlət quruluşuna qarşı beynəlxalq və məkrli plan var: "Son zamanlar, xüsusən də Azərbaycanda növbəti prezident seçkiləri 11 aprelə təyin olunandan sonra xaricdəki mərkəzlər məkrli ”Azərbaycan layihəsi"ni dövriyyəyə buraxaraq, bu işə xarici ölkələrdə müxtəlif vasitələrlə öz təsirləri altında saxladıqları bəzi soydaşlarımızı qoşublar. Qısa zaman kəsiyində bu çirkin kampaniya ifrat həddə çatıb.

Hədəf sadəcə Prezident və onun ailə üzvləri, komandası, o komanda üzvlərindən biri olan mən - Əli Həsənov deyil. Məqsəd Şərq mentalitetinin incəliyinə hesablanıb - hədəf birinci şəxsin və komandasının müsbət imicini zədələməklə, onlara qarşı kütləvi narazılıq ovqatı formalaşdırmaqla, komandadaxili qarşıdurma yaratmaqla ölkədəki mövcud sabitliyi pozmağa nail olmaqdır. Bu işin təşkilatçıları və icraçılarını Azərbaycanı suriyalaşdırmaq istəyən "virtual İŞİD” adlandırmaqda haqlı olduğum indi həmin qüvvələrin "ağsaqqalları” tərəfindən dolayısı ilə etiraf olunur.

Əslində, bu, yeni plan da deyil. Hələ Dağlıq Qarabağ münaqişəsi yeni başlayanda erməni lobbisi öz mənfur arzusuna çatmaq üçün Bakını Beyruta, Azərbaycanı Livana çevirmək istəyirdi və bunu gizlətmirdi. Həmin qüvvələr və "sapı özümüzdən olan baltalar” 2003 və 2008-ci illərdə ciddi cəhdlə buna çalışdılar. Lakin o dövrdə Prezident İlham Əliyevin xalqla birliyinə və dəmir iradəsinə çırpılaraq geri çəkildilər.

Belələri 2013-cü ildə yeni bir məkrli plan quraraq, xarici dairələrin köməyi ilə " Milyarderlər İttifaqı” yaratdı və "aldanmış kəvakib”dən istifadə edərək hakimiyyəti ələ keçirməyə cəhd etdilər. Xoşbəxtlikdən hər dəfə də bu antimilli ünsürlər ölkə Prezidentinin dəmir iradəsi, onun sədaqətli silahdaşlarının yekdil mövqeyi və ən əsası, Azərbaycan xalqının keçilməz müqaviməti ilə üzləşərək necə gəlmişdilərsə, eləcə də rədd olub getdilər. Bu gün də onlar yatmayıb, sadəcə olaraq qəfil yaxalandıqları üçün hazırlıqsızdırlar. Odur ki, güman qalıb onların daimi bacardıqları işə - xəyanətə, hiyləyə və bir də söyüşə. Bu dəfə "livanlaşdırma” termini də dəyişib və "suriyalaşdırma” ilə əvəz olunub".

Politoloq Qabil Hüseynli "Yeni Müsavat”a şərhində bildirib ki, Əli Həsənov konseptual çıxış edərək çox ciddi və bütün xalqımızı düşündürməli olan məsələləri açıb. Media haqlı olaraq bu çıxışı Azərbaycana qarşı məkrli planın deşifrə olunması kimi təqdim edir: "Doğrudan da həmin çıxışdakı bir sıra məqamlardan aydın görünür ki, ölkəmizə qarşı xain bir plan olub və bu barədə hakimiyyətin ən üst qatlarında informasiyalar olub. Azərbaycanı suriyalaşdırmağa qədər xain planlardan söhbət gedir. Bunu planlaşdıran mərkəzlərin işi ilə erməni mərkəzlərinin işi demək olar ki, üst-üstə düşür. Yəni dövlətçiliyimiz əleyhinə ciddi təhlükələr var idi, indi də qalmaqda davam edir. Prezident seçkisini qabağa çəkməklə bu təhlükə müəyyən qədər sovuşdurulub. Amma təhlükə hələ də qalmaqdadır. Üzdəki ”söyüş makinaları" olaraq çıxış edən adamlar aysberqin görünən tərəfidir. Aysberqin görünməyən tərəfində daha böyük qüvvələr və pullar var, qarşıya çox ciddi hədəflər qoyulub. Azərbaycan dövlətçiliyinə qarşı ciddi mübarizə hədəfləri seçilib".

Politoloqun sözlərinə görə, diqqətçəkən məqamlardan biri də Əli Həsənovun Azərbaycan hakimiyyətinin sosial şəbəkələrin, internet azadlığının əleyhinə olmadığını vurğulamasıdır: "Sosial şəbəkələrdən Azərbaycanın fəal kəsimi, jurnalistlər, cəmiyyət Azərbaycana qarşı olan qüvvələrə qarşı səmərəli istifadə etməlidir. Bu, bütün cəmiyyətin işi olmalıdır. Çünki söhbət dövlətçilik uğrunda mübarizədən gedir. Hakimiyyət uğrunda mübarizədə seçkilər hər şeyi həll edir. Amma dövlətçilik uğrunda mübarizə hər şeydən öndə olmalıdır. Çünki belə görünür ki, xaricdəki qüvvələr Azərbaycan dövlətçiliyini məhv etməyi qarşılarına məqsəd qoyublar. Mənim özümün də bu haqda müəyyən məlumatlarım var idi, amma Əli Həsənovun çıxışı ortada daha ciddi durumun olduğuna məndə əminlik yaratdı. Azərbaycana qarşı başladılan kampaniya çox təhlükəli tendensiyadır. Bu təhlükəli tendensiya bəlli mərkəzlər tərəfindən istiqamətləndirilir. Azərbaycan dövlətçiliyi əleyhinə planlı mübarizə aparılır. Çox sərt mübarizə üsullarını, həm də yonulmamış və təkmilləşdirilməmiş mübarizə metodlarından istifadə edirlər. Özü də bu planı hazırlayanlar hiyləgərcəsinə hərəkət edərək Azərbaycan xalqının mentalitetinə uyğun siyasət qurublar. Bu mentalitet də ondan ibarətdir ki, Azərbaycan xalqı namus, qeyrət, ailə, qadın məsələsində çox həssasdır və planı hazırlayanlar məhz o həssas nöqtələrə zərbələr endirirlər. Gözdən salma və hakimiyyət komandası daxilinə inamsızlıq, parçalanma toxumu səpmək də planın tərkib hissəsi olaraq görünməkdədir”.

Q.Hüseynli daha sonra bildirdi: "Aldığım daha bir təəssürat ondan ibarətdir ki, Əli Həsənov informasiya və təbliğat kimi mühüm sahəyə məsul olan bir dövlət rəsmisi kimi Azərbaycan dövlətçiliyinə qarşı başlanan kampaniyaya qarşı əks-təbliğatın qurulmasında çevik rol oynayır və bu çevikliyin nəticəsində həmin Azərbaycan əleyhinə olan planların böyük bir hissəsi artıq deşifrə olub, heçə çıxıb”.

Oxşar xəbərlər