Prezident İlham Əliyevin sərəncamı ilə Polkovnik İnqilab Muradova General-mayor hərbi rütbəsi verilib. Ali rütbəyə layiq görülən şəxs Daxili İşlər Nazirliyi Daxili Qoşunlarının Qərargah rəisinin 1-ci müavinidir.

Qeyd edək ki, Muradov İnqilab Heydər oğlu 1967-ci ildə Zərdab rayonunun İsaqbağı kəndində anadan olub. Uşaqlıq illərindən hərbiyə böyük maraq göstərib.

1984-1988-ci illərdə Rusiyanın Kamışinski Ali Hərbi Komandanlıq Məktəbində təhsil alıb. 1993-cü ildən Azərbaycan Respublikası Daxili İşlər Nazirliyinin Daxili Qoşunlarında xidmətini davam etdirir. İnqilab Muradov mküxtəlif vaxtlarda DQ-nin N saylı hərbi hissələrində briqada komandiri olub.

Azərbaycan Respublikasının mərhum prezidenti Heydər Əliyevin 30 iyun, 2002-ci il tarixli sərəncamı ilə Azərbaycan Respublikasında ictimai qaydanın və ictimai təhlükəsizliyin qorunmasında, mütəşəkkil cinayətkarlığa, terrorçuluğa və digər təhlükəli cinayətlərə qarşı mübarizədə, qanunsuz silahlı dəstələrin zərərsizləşdirilməsində xüsusilə fərqləndiyinə, şücaət və igidlik göstərdiyinə görə "Azərbaycan bayrağı” ordeni ilə təltif edilib.

Prezident İlham Əliyev İ. Muradovun nümunəvi xidmətini nəzərə alaraq onu 2007-ci ildə Bakı şəhərində mənzillə təmin edib.

İnqilab Muradov "Qüsursuz xidmətlərə görə”, "Hərbi xidmətlərə görə”, 2 və 3 dərəcəli "Hərbi xidmətdə fərqlənməyə görə”, Azərbaycan Respublikası Silahlı Qüvvələrinin yubiley medalları ilə də təltif olunub.

Prezidentin sərəncamı ilə 2018-ci ildən İnqilab Muradov Daxili İşlər Nazirliyi Daxili Qoşunlarının Qərargah rəisinin 1-ci müavinidir.

Qeyd edək ki, Prezidentin sərəncamı ilə general-mayor ali hərbi rütbəsi alan digər şəxs Səlim Niftəliyevdir. S.Niftəliyev Daxili Qoşunların "Naxçıvan” Əlahiddə Əməliyyat Briqadasının komandiridir.

Demokratik.Az