Nazir Bakı sakinlərinin təhlükəsizliyindən danışdı "Əminəm ki, birinci Avropa Oyunları zamanı insanların təhlükəsizliyi ən yüksək səviyyədə təmin ediləcək."

ANS PRESS-in məlumatına görə, bunu fövqəladə hallar naziri Kəmaləddin Heydərov Böyük Britaniyanın "The Business Year" nəşrinə müsahibəsində deyib.

Trend-in məlumatına görə, o söyləyib ki, Fövqəladə Hallar Nazirliyinin müvafiq departamentləri fövqəladə hallarda evakuasiya planları hazırlayır və bu planların tətbiqi ilə bağlı müxtəlif təlimlər keçirir. Fövqəladə vəziyyətə dərhal reaksiya vermək məqsədilə fövqəladə xilasetmə resurslarının planlaşdırılmasına xüsusi diqqət yetirilir.

Nazir bildirib: "Biz nazirliyin bütün resurslarını və imkanlarını bir nöqtədən idarə etmək üçün komanda mərkəzi yaratmağı nəzərdə tuturuq. Eyni zamanda, «Bakı 2015» Təşkilat Komitəsi ilə sıx əməkdaşlıq yaratmaq məqsədilə nazirliyin müxtəlif departamentlərin nümayəndələrindən ibarət işçi qrupu yaradılıb və daimi əlaqələndirici təyin edilib."

Xatırladaq ki, bu il mayın 19-da Bakının Binəqədi rayonundakı 16-mərtəbəli yaşayış binasında yanğın olub. 15 nəfər ölüb, 50-dən çox insan müxtəlif xəsarətlərlə xəstəxanalara yerləşdirilib. Bundan sonra şəhərdə fasadı üzlənmiş bir çox binaların yanına yanğınsöndürən maşınlar qoyulub, binalar mühafizəyə götürülüb.