Eldar Əzizov Abutalıbovun korrupsiya yuvasının “işığı”nı söndürdü

  • 20 noy 2019, 10:36

Hesablama Palatası hələ bir müddət əvvəl "Bakı Şəhər İşığı” Elektrik Şəbəkə Müəssisəsində xeyli maliyyə pozuntusu aşkarlamışdı 

Bakı Şəhər İcra Hakimiyyətində kadr dəyişiklikləri olub. BŞİH-in başçısı Eldar Əzizovun əmrinə əsasən, "Bakı Şəhər İşığı” Elektrik Şəbəkə Müəssisəsinin direktoru Təyyar Abdullayev vəzifəsindən azad edilib. İcra başçısının digər əmri ilə onun yerinə Eldar Eldarov gətirilib. (Oxu.az)

"Yeni Müsavat” xəbər verir ki, Bakı Şəhər İcra Hakimiyyətində Hacıbala Abutalıbov dövründə baş vermiş korrupsiya halları artıq bir neçə müddətdir ki, xüsusi komissiya tərəfindən araşdırılır. Bakının sabiq meri və  baş nazirin sabiq müavini Hacıbala Abutalıbova yönəlik ciddi ittihamlar yer alır. Təsadüfi deyil ki, E.Əzizov meriyaya gətiriləndən sonra Abutalıbovun adı korrupsiyada hallanan xeyli kadrını işdən çıxarıb. 

Hesablama Palatasının "Bakı Şəhər İşığı” Elektrik Şəbəkə Müəssisəsində də keçirdiyi audit xeyli maliyyə pozuntuları üzə çıxarıb. Audit ümumilikdə 860 min manat məbləğində vəsaiti əhatə edib. Məlum olub ki, "Bakı Şəhər İşığı” Elektrik Şəbəkə Müəssisəsinin əsasnaməsində məhəllədaxili yolların və həyətlərin, həmçinin yaşayış binalarının giriş qapılarının işıqlandırılması nəzərdə tutulsa da, bu istiqamətlərdə müəssisənin fəaliyyəti auditin əhatə etdiyi dövrdə qənaətbəxş olmayıb.

Genişmiqyaslı yenidənqurma və abadlıq işlərinin aparılması ilə bir çox küçə və prospektlərdə işıq nöqtələrinin sayında dəyişikliklər baş versə də, istismarı planlaşdırılan işıq nöqtələrinin sayı təxmini hesablamalarla müəyyənləşdirilib. Küçələrin işıqlandırılması xərclərinə ayrılmış vəsaitdən memarlıq abidələrinə aid olan arxitekturalı binaların fasadlarının və yaşayış binalarının giriş hissələrinin işıqlandırılmasından əlavə illik enerji xərcinin 29%-ni təşkil edən digər işıqlandırmalar həyata keçirilsə də, müəssisənin əsasnaməsində müvafiq dəyişikliklər edilməyib.

29 ədəd nəqliyyat vasitəsinə normadan artıq yanacaq silinib, avtoqəza və digər qəzalar zamanı işıq dirəklərinə dəymiş ziyana görə müxtəlif mənbələrdən ödənilmiş vəsait xərclər smetasında nəzərdə tutulmayan istiqamətlərə xərclənib. Əməyin ödəniş dərəcəsi düzgün müəyyən edilməyərək artıq əmək haqqı xərcinə yol verilib. 2017-ci ilin yanvar-aprel aylarında 14 halda dövlət satınalmaları tətbiq edilmədən müxtəlif icraçılardan birbaşa bağlanılmış müqavilələrə əsasən mal-materialların alışı həyata keçirilib.

2017-ci ildə balansında olan işıq dirəklərinə avtomobil qəzası ilə dəymiş ziyana görə dəyərin təqsirkar şəxslərdən alışı təmin edilməyib və müəssisənin debitor borcuna daxil edilməyib. Hesablama Palatasının Kollegiyası auditin nəticələrini müzakirə edərək qərar qəbul edib. Müəyyən edilmiş nöqsanların aradan qaldırılması, o cümlədən müəssisənin əsasnaməsi ilə fəaliyyəti arasındakı uyğunsuzluqların həll edilməsi, istismarı planlaşdırılan işıq nöqtələrinin dislokasiyasının tərtib olunması, təsərrüfat gəlirləri hesabına maliyyələşdirilməli olan xərclərin büdcə vəsaiti hesabına ödənilməsi hallarına yol verilməməsi, həmçinin hüquq pozuntusuna yol vermiş vəzifəli şəxslərin qanunvericiliklə müəyyən olunmuş qaydada məsuliyyətə cəlb edilməsi məqsədilə müvafiq tədbirlərin görülməsi üçün qərarın surəti Bakı Şəhər İcra Hakimiyyətinə, Bakı Şəhər Baş Maliyyə İdarəsinə, Bakı Şəhər İcra Hakimiyyətinin "Bakı Şəhər İşığı” Elektrik Şəbəkə Müəssisəsinə göndərilib.

Oxşar xəbərlər