Göygöl SSİ-də benzin, artezian və bəndbərkitmə MAXİNASİYASI

  • 10 mart 2019, 11:59

Göygöl Suvarma Sistemləri İdarəsində meliorasiya adına süni və çirkin maxinasiyalar davam etdirilir.

Son aylarda bu idarə barədə çeşidli yazılar yazsaq, tənqid etsək də heç nə dəyişmir. Əksinə, adıçəkilən idarəyə rəhbərlik edən İlqar Məhərrəmov adlı yarıtmaz və bambılı şəxs yazılarımızdan çıxış yolu kimi, "Demokratik.Az"-a qarşı həyasızlıq taktikasına həvəs edərək zərərli mərəzindən əl çəkə bilmir. Məmurun xəstə təfəkkürü mediaya münasibətdə də ortadadır.

Bizə qarşı həm Mətbuat Şurasında, eləcə də məhkəmə müstəvisində girinc görünən bu alçaq boylu məmur korrupsiya hesabına yığdığı pulunu sağa-sola səpələyərək provokativ hərəkətlərə gedir. Hətta, ən savadsız media adamlarına qoşularaq, bəzi bədxahlara sponsorluq edərək üstümüzə də cumdurur. Xoşbəxtlikdən, "itlər hürər, karvan keçər" zərb-məsəli əsas devizimizdir.

Məmurun Mətbuat Şurasına barəmizdə yazdığı böhtan-təhqir dolu məktubu "uğurlu" alınsa da, MŞ-nin funksioneri, şikayətlər komissiyasının sədri Müşviq Ələsgərlinin dramatik media şousuna dönüşdürülsə də, əslində öz rəzilliklərinin ən pik tərkib elementidir. 

Baş meliorator Əhməd Əhmədzadə isə olanlara susqundur. Belə dəngülüş məmuru ASC şefi də azı Mətbuat Şurası qədər himayə edir. Yəqin, beləsi adıçəkilənlərə maddi maraqlar naminə daha sərfəlidir...

Məhz, İlqar Məhərrəmovun özbaşına fəaliyyəti Göygöl rayonu üzrə həyata keçirilməli meliorativ tədbirləri xeyli iflic edib. Bunu görünməz etməyə çalışanlar, acı etirafdan hələ də yayınanlar, dövlətçiliyə "sevgilərini" ancaq öz şəxsi maraqları təmin edilənda piar edənlər azından ölkə rəhbərinin Azərbaycan Kənd Təsərrüfatı sahəsinin inkişafına yönəlik mövqeyinə və məqsədyönlü işlərinə xəyanət edənlərdir. Bunlara qarşı mübarizə aparmaq, ifşa etmək olduqca vacibdir. Baş meliorator olmağı özünə "ömürlük" kürsü edə bilmiş Əhmədzadənin dövlətçilik mövqeyi isə tabeliyindəki məmurların avaralığını dayanıqlı etmək mövqeyi ilə uzlaşmır.

Göygöl SSİ-də indi nə varsa, kim varsa kimlərinsə gözünə potensial gəlir kimi görür. 

Son illər statistik hesabatlarla baş aldadan Göygöl "torpaqları yaxşılaşdırma" idarəsi rəisinin şəxsi maraqları ilə kənd təsərrüfatının inkişafı adına fərli bir iş görülməyib. Torpaqların suvarılması öhdəliyini daşıyan bir qurum rəhbəri yalnız öz cibini, şəxsi var-dövlətini cücərtməklə məşğuldur. Bu idarədə başını alıb gedən bir neçə mühüm problemə yenə diqqət çəkək.

AYRILAN TONLARLA YANACAQ DİGƏR İNVENTARLAR KİMİ TALANIR...

İdarədə dövlət vəsaiti hesabına ağır tonnajlı texnikalara, traktorlara ayrılan dizel və benzin yanacağının, yağ və sürtkü materiallarının talanması açıq müşaiyyət olunur. İdarəyə ayrılan yanacaq müdirin ata-baba malı kimi hər gün havaya sovrulur, müxtəlif adda şəxsi yanacaqdoldurma məntəqələrində satılmaqla İlqar Məhərrəmovun cibinə pullar doldurur.

Hələ sovetlər dönəmindən idarənin (Göygöl r, Totanlı-111) həyətində quraşdırılan xüsusi yanacaqdoldurma deposu illərdir ki, təyinatından kənar quru və lazımsız halda benzin özbaşınalığına şahidlik edir.

Aldığımız məlumata görə, idarəyə ayrılan tonlarla yanacaq limiti Göygöl rayonunun Üçtəpə kəndində yol kənarında yerləşən, kəndin bələdiyyə sədrinə məxsus "Alik" petrolda fərdi müştərilərə satılır. Bu artıq toxunulmaz adət halını alıb. Tərəflər arasında müqavilənin mövcud olmadığı isə məsuliyyət yükünün ağırlığını bir az da artırır.

Talançı idarə müdirinin göstərişi ilə bəzi adamlar, qonaq və "dilənçi media" qismində idarənin qapısına gələnlər utanmadan "Alik" petroldan maşınlarına pulsuz yanacaq alaraq "yararlana" bilirlər. Bu siyahıda artıq bizə qarşı "dızıldamaqla" məşğul olan bəzi üzdəniraq media təmsilçiləri də var. 

Aldığımız məlumata görə, idarənin yanacaq limitini öz şəxsi istəyilə talayan İ.Məhərrəmov idarənin texnikalarını arendaya verdiyindən, əksər texnikalar yanacaqla təminat öhdəliyi hiss etmir. Çünki həmin texnikalar öz yanacağını günəmuzd olaraq qapısında işlədiyi fərdi şəxslərin hesabına ödəyirlər. Traktorlar istənilən gün tikiləcək fərdi yaşayış evlərinin katlavanını, binəsini qazmaqla xeyli gəlir əldə edir. Sürücülər meliorativ işlərdən kənar karlı pullar qazanır, günaşırı İlqar Məhərrəmovla bölürlər. Yoxsa, "JEEP"lər, inomarka maşınlar alıb sürmək, otağında bahalı balıqları yemləmək, özünə partnyor hiss etdiyi savadsız qrafomanları Gəncəyə dəvət etmək xərcləri bu məmura göydən pulsuz, havayı tökülmür ki...

Aldığımız məlumata görə, idarənin balansında olan ən bahalı traktor texnikası da müdirin maxinasiyalarına cəlb edilib. İllər əvvəl ASC sədri Əhmədzadənin təşəbbüsü ilə Belarusiyadan alındığı iddia edilən və qiyməti yüz minlərlə ölçülən müasir texnika da lildəntəmizləmə işlərindən yayındırılaraq müdirin cibinə pul qazandırır.

Məlumata görə, müxtəlif növ traktorlar çömçəsinin tutumuna, gördüyü işin hesabına kağız üzərində büdcədən vaxtaşırı "pul yeyir". İdarənin ən bahalı nəhəng buldozer texnikası isə guya axar suyun suvarılan torpaqlara təminatının yaxşılaşdırılması üçün meliorativ tədbirlər çərçivəsində ayda 1500-3000 manat civarında "pul qazanır".

İllərin hesabatına baxsaq aydın olar ki, güya kanallarda minlərlə kilometrlik lidəntəmizləmə işləri görülüb. Texnikaların "işlətdiyi" yanacaq və təmir-servis haqqı sümürən texnikalara təəssüf ki, qurumun yuxarı şəxsləri tərəfindən inzibati nəzarət, hansısa təftiş həyata keçirilmir, nəticədə maxinasiyanın sərhədləri genişlənir.

Göygöldə bütün çay məcrasına, kanalların durumuna baxılsa lillənmənin illərdir təmizlənmədiyi faktı zatən ortaya çıxar. (ayrıca mövzuda daha detallı yazacağam-O.N)

Aldığımız məlumata görə, bu özbaşınalıqlara susqunluğun əsas səbəbi, İlqar Məhərrəmovun ASC-dəki himayədarı müavin Rafiq Aslanovun hesabınadır. İlqar Məhərrəmovun dediyi iddialara inansaq, bu dılğır məmur Rafiq Aslanova kvartalda, hesabatlarda karlı haqq verir. Ona görə də açıq himayə olunur. Rafiq Aslanovun ASC rəhbərliyi ilə qudalıq bağları isə "qalaqurma"nı lap bərkidir. Əhmədzadənin yerdəki dostu, jurnalist Əhməd İsayevin ayrıca kurasiyası barədə də əvvəlki yazıda məlumatlar vermişdik. Bu durumda, cənab Əhmədzadəyə təklif edərdik ki, bu idarəyə yanacaq limitini dayandırsın, əgər texnikalar özbaşına işlərə cəlb edilməklə pul-yanacaq qazana bilirsə, bu ad altında büdcə vəsaitinin talanmasını hökmən durdursun. Olmasın, qudası Aslanovun bir idarədən qamarladığı gəlirlər...

SSİ rəisi artezianların sayını "itirib" (?!) 

Göygöl SSİ hazırda öz balansında 250-dən artıq artezianı birləşdirir, eləcə də müxtəlif gücə sahib aqreqatlı su-nasos qurğuları ilə 15 min ha yaxın əkin sahəsinə xidməti üzərinə götürür. İdarə təkcə bu resurs mövcudluğuna görə, il ərzində torpaqların suvarılmasına dövlət büdcəsindən yarım milyon manatdan artıq datasiya alır. Təəssüf ki, bu idarə rəhbərinin zehni yanaşmasında talançılığa, varlanmağa şərait yarada bilir. Elektrik enerji sərfiyyatından da doğru istifadə etməyən, bütün su birliklərinin əli ilə müxtəlif məbləğlərdə yığımlar həyata keçirən Göygöl SSİ artezian sayını süni şəkildə artıraraq ayrılan datasiyanın məbləğində aşkar büdcə maxinasiyası həyata keçirir.

Əldə etdiyimiz məlumata görə, idarənin statistik rəqəmlərində 10-larla adı olub özü olmayan artezian sayına rast gəlinir. Gəncə və Göygöl rayonları ərazisində elə artezianlar var ki, illərdir yararsız vəziyyətdədir, lakin limit xərci yazılır və pulu yeyilir. Balansda yer alan əksər artezianların vurulmasının bu idarəyə ümumiyyətlə aidiyyatı yoxdur, özbaşınalığa meyillilik SSİ-nin illik statistik hesabatlarından da bəlli olur.

Metr götürün, sahil-bərkitmə işlərini də ölçək...

"Demokratik.Az"-a verilən digər məlumatlara görə, idarə rəisi kağız üzərində sel və daşqınlardan yayınmaq məqsədilə Gəncə çayı, "Ərəbli" və "Xan Arx" su kanalları boyunca "sahil bərkitmə" işlərinin aparıldığını rəsmiləşdirməklə xeyli investisiya vəsaitini "xırıd" etmişdir. Təkcə, Gəncə çayının sahilində sovet dövründən yadigar qalan beton örtükləri, hətta köhnə körpüləri, plitələri yenisi kimi göstərməklə, ala-yarımçıq suvaq işləri gördürməklə aldatmalar edilir.

 

 

Təsadüf deyil ki, Göygöl SSİ-nin heç bir hesabatında "görülmüş" bənd bərkitmə işinin konkret ölçüsü, uzunluğu, smeta xərcləri barədə hansısa geniş məlumata rast gəlinmir. Yalnız, "Ərəbli" və "Xan arx" su kanallarının Göygöl-Üçtəpə yolundan görünən bir neçə yüz metrlik hissəsində beton işlərini aparıldığını görmək mümkündür. Həmin "Ərəbli" kanalı ki, uzunluğu 25 km-dir, lakin talançı müdir televiziya qarşısında özünü reklam edərkən həmişə betonlanmış məhdud yerləri gözə soxur.

 

20 km-ə yaxın uzunluqda olan "Xan arx" su kanalı barədə də meliorativ uğurlardan danışmaq yersiz olardı. Bu kanal da kağız üzərində dəfələrlə təmizlənmiş, xeyli hissəsi guya betonlanmış kimi "pripiska"ya məruz qalıb.

İldə bir dəfə arxasında traktor televiziya kamerasına pozlar verən idarə rəisinin və arendadakı traktorların çömçəsinin əslində ayrılan pulları qazıdığı faktı ortadadır. Hər açıqlamasında bu kanalların hər birində ildə bir kilometrlik betonlama işinin görüldüyünü "üfürən" İlqar Məhərrəmov bu maxinasiya hesabına 100 minlərlə manatı necə havaya sovurduğunu beləcə özü də etiraf edir. Bircə, qalır bu maxinatorun fəaliyyətini dərindən təftiş etmək və meliorasiya adına yaradılan korrupsiya bataqlığında İlqar Məhərrəmov kimiləri boğub başqalarına xoş nümunə aşılamaq, vəssalam...

Azərbaycanda kənd təsərrüfatının inkişafı naminə bu tələb və istək təkcə bizim deyil, həm cənab Əhmədzadələrin, baş prokurorluq və korrupsiya orqanlarının, xüsusilə də bütün vicdanlı mətbuat nümayəndələrinin arzusu olmalıdır. Yoxsa, İqlar Məhərrəmovun korrupsiyalaşmış şoran torpağı hələ çox su aparacaq...

Osman Nərimanoğlu

Növbəti sayımızda oxuyacaqsınız:

- Bütün subartezianların interaktiv (internetlə kənardan) idarəetmə mexanizminə keçiddə İlqar Məhərrəmovun israrı nəyə hesablanıb? Əsas maddi məqsəd nədir?

- Göygölün hansı kəndlərinin "Su birlikləri"nin möhürü İlqar Məhərrəmovdadır?

- Göygöl şəhəri "Su birliyi"nin rəhbəri niyə məhz Arif Seyidovun qohumu Rəşiddir?

Üçtəpə bələdiyyəsinin sədri, "Alik" petrolun sahibi İlqar Məhərrəmova nə qədər torpaq sahəsi satıb? İdarənin benzin maxinasiyası tərəflərə nə qədər real gəlir vəd edir?

- Göygöl icra başçısının maliyyə rəisinə tapşırığı İlqar Məhərrəmovda niyə stress yaşadıb? Başçı rayondakı işlərin görülməsi adı altında SSİ rəisinə hansı məbləğdə işlərin görülməsini tələb edib?

- Göygöl rayonunda üzümçülüyün inkişafında Kəmaləddin Heydərovun, Bəylər Eyyubovun adı niyə hallandırılır? Axı İlqar Məhərrəmov hansı mənəvi haqla bu generalların adını çəkir?

- İlqar Məhərrəmov "AqroAzərinvest"-dən və Göygöl şərab zavodundan ("Vinaqro" MMC) niyə narazıdır? Üzüm sahələrinin suvarılması üçün illik ödəniş necə və hansı məbləğdə həyata keçirilir?..

Demokratik.Az

  

Oxşar xəbərlər