Ərdoğan və Türkiyə deyən oldu

Türkiyədə nəfəskəsici tarixi seçkilər arxada qaldı. Prezident seçkisində Rəcəb Tayyib Ərdoğan, parlament seçkilərində isə AKP-MHP koalisiyası qalib gəldi. Nəticə bir elə təəccüb doğurmadı - bəzi nüanslar nəzərə alınmazsa. Məsələn, ikinci turla bağlı təxminlər düz çıxmadı.

Əsas odur ki, kritik seçkilər artıq arxadadır və qardaş məmləkət öz inkişaf yoluna daha rahat şəkildə davam edə bilər. Türkiyə toplumun yarıdan bir az çoxu (52.5) bu yolu yenə Ərdoğan və partiyası ilə getməyə qərar verdi. Yerdə qalan kəsim - hardasa 48%-lik elektorat da şəksiz ki, böyük bir toplumdu və yeni-köhnə prezident onların da prezidenti olmağa borcludur, bunu bacarmalıdır.

Söhbət ölkədə seçkisonrası milli barışın təmin edilməsi və qisasçılıq ab-havasına yol verilməməsi üçün prezidentin atmalı olduğu addımlardan gedir. Bizcə, cənab Ərdoğan bunları edəcək. Qardaş ölkənin yerləşdiyi mürəkkəb regionun ağır geosiyasi şərtləri də bunu diktə edir. Artıq Ankaradakı "balkon çıxışı”nda Ərdoğan bu yöndə bəzi mesajlarını verib. "Bu seçkinin qalibi demokratiyadır. Bu seçkinin qalibi 81 milyon vətəndaşımızın hər biridir” deyib. Davamı da olar, İnşallah. 
Daha bir mühüm məqam: müxalifət seçkilərin nəticələrini tanıyıb. Ərdoğanın əsas rəqibi – 31% səs alan Məhərrəm İncə məğlubiyyətini etiraf eləyib. Hərçənd o, seçkilərin çox da ədalətli keçmədiyini deyib. Müəyyən mənada haqlıdır. Hakimiyyət seçkilərdə inzibati resurslardan qismən istifadə eləmiş kimi göründü. Ancaq insaf naminə, bu, yekun nəticəyə həlledici təsir gücündə olan amil deyil.

İncənin Türkiyə dövlətçiliyi naminə Ərdoğana zəng edib təbrik eləməsi də seçkilərin legitimliyi baxımından məntiqli gediş olardı. Ümumiyyətlə, müxalifətə təşəkkür və təbrik düşür ki, xaricin, Qərbin müəyyən dairələrinin şirnikləndirici, məkrli oyunlarına uymadı, tələyə düşmədi və yalnızca Türkiyə xalqının və dövlətinin maraqlarını göz önünə alaraq seçki kampaniyası apardı. Bununla da hər iki seçkinin demokratikliyinə misilsiz töhfə verdi.

Qalır indi Qərbin seçkinin legitimliyini qəbul eləməsi. Yəqin ki, Avropa və ABŞ-dan da təbriklər gələcək. Hər halda, bu, Ərdoğanın yox, Türkiyə xalqının əksərinin demokratik seçimidir. Kiminsə kimdən xoşu gəlməyə bilər, amma Türkiyə xalqının iradəsi yüksək hörmətə layiqdir...

Xaricdən ilk təbrik isə gözlənildiyi kimi, Azərbaycan prezidentindən gəldi. Türkiyə mediası buna məxsusi diqqət çəkdi. Bu da təbiidir. Adam ilk təbriki həmişə öz doğmasından, qardaşından gözləyir. İlham Əliyev üstəlik, Ərdoğanı ölkəmizə səfərə dəvət elədi. 

Yadınıza gəlirsə, 11 aprel seçkilərindən sonra İlham Əliyev ilk xarici səfərini Türkiyə eləmişdi və o zaman Ərdoğan 24 iyundan sonra birinci səfərini Azərbaycana etmək üçün Əliyevdən dəvət alacağına ümid etdiyini söyləmişdi. Türkiyə xalqı ona bu fürsəti tanıdı. Ərdoğan deyən oldu. Daha dəqiqi, Türkiyə deyən oldu. Çünki seçkilərin əsas qalibi odur – Ərdoğana və İncəyə səs verən Türkiyə xalqı.

Şübhə yox ki 52,5%- lik qələbə Ərdoğanın üzərinə böyük məsuliyyət qoyur. Hər halda, bu nəticə demokratik seçkinin göstəricisi olsa da, elə yüksək göstərici də deyil.

Nəzərə alsaq ki, təzə parlamentdə üstünlük "Cümhur ittifaqı”nda olacaq, bu, Ərdoğana unikal imkan yaradır ki, yeni böyük və yarımçıq layihələri uğurla davam etdirmək, qardaş məmləkəti hər cəhətcə gücləndirmək, əhalisinin rifahını daha da yaxşılaşdırmaq üçün daima parlamentin də dəstəyini arxasında hiss eləsin...

Beləcə, Türkiyə rəsmən prezidentli üsul-idarəyə keçdi. Qardaş ölkə üçün, Azərbaycan üçün, bütövlükdə türk toplumu üçün, Qarabağ üçün uğurlu və düşərli olsun!..

Deyirlər, bıçaq cərrahın əlində bir, cinayətkarın əlində isə ayrı anlam daşıyır. Son seçkilərlə Ərdoğan prezident kimi böyük səlahiyyətlər qazanmaqla yanaşı, öz üzərinə böyük məsuliyyət də götürmüş oldu. Ümid edirik ki, səlahiyyət "bıçağı”ndan” o, cərrah dəqiqliyi ilə istifadə edəcək - Türkiyə və türk xalqı naminə.

Mübarəkdir!!

Zahid SƏFƏROĞLU