Xeyrəddin Qoca BNA-nı ifşa etdi: "Bütün protokolları qanunsuzdur..." - FAKT

  • 06 mart 2019, 21:58
Tanınmış yazıçı, diplomat, Milli Məclisin keçmiş deputatı ilə Bakı Nəqliyyat Agentliyi arasında ciddi qalmaqal yaranıb. Belə ki, Xeyrəddin Qocanın qızı övladını 20 nömrəli məktəbə qoyan zaman dayanma-durma qaydalarını pozub və BNA kamera görüntüləri əsasında ona protokol tərtib edib. Yazıçı isə sosial şəbəkələrdə bu məsələyə etiraz edərək bu protokolun qanunsuz olduğunu bildirib. Ardınca BNA-nın mətbuat katibi Mais Ağayev açıqlama yayaraq fotolar paylaşıb, Xeyrəddin Qocaya tövsiyyələr verib. 
Sfera.az saytına müraciət edən yazıçı bildirib ki, onun etirazı heç də protokol yazılmasına görə olmayıb. "Bu protokollar tamamilə qanunsuzdur. Çünki İnzibati Xətalar Məcəlləsinin 125-ci maddəsində elektron qaydada qeydə alınan inzibati xətaların siyahısı var. Yəni kamera görüntüləri ilə hansı hallarda protokol yazılmalıdır. Bu siyahıda dayanma-durma qaydalarının pozulmasına görə protokol tərtib olunması yoxdur." 
Xeyrəddin Qoca qızının avtomobilinin şəkillərinin sosial şəbəkələrdə yayılmasına  etiraz edib. Bildirib ki, bu yolverilməzdir. "BNA-nın mətbuat katibi Mais Ağayev tərbiyəsizcəsinə mənim qızımın maşının fotosunu paylaşıb. Yazır ki, guya mən protokol yazıldığına görə etiraz etmişəm. Əvvəla mən protokolun yazılmasına görə etiraz etməmişəm. Protokol yazılıb, gedib ödəyərik. Mənim etirazım odur ki, BNA-nın səlahiyyətləri hələ nə Milli Məclis, nə də Nazirlər Kabineti tərəfindən təsdiqlənməyib. Amma BNA öz yaydığı açıqlamada bildirir ki, gündə 3000-4000 maşına protokol tərtib olunur.
Hər gün də qanunsuzluq edirlər. Mənim qızım lazımi qurumlara rəsmi şəkildə müraciət edib."
Xeyrəddin Qoca deyir ki, mətbuatda yazı ilə çıxış edəndən sonra Mais Ağayev ona zəng edərək təhqir edib. "Mənə zəng edib ağzına gələni dedi. Bu birinci hal deyil. Məndən əvvəl Rəşad Məcid, Səfər Alışarlı və digərləri də bu mövzuda yazıb."
Xeyrəddin Qoca BNA-nı lazımsız qurum adlandırıb. "Bu lazımsız bir qurumdur və ləğv olunmalıdır. Ancaq küçələrdə camaatdan pul yığmaqla məşğuldurlar. Yəqin ki, elə həmin idarəyə işçiləri də pul müqabilində işə qəbul edirlər. Çünki orda  pul qazanmaq imkanları yaranıb. Dövlət Yol Polisi, DANX ola-ola belə bir idarəyə nə ehtiyac var? Bunların səlahiyyətləri hələ məlum deyil. Bəs bu adamları küçələrə kim və nəyə görə salıb? Bütün insanlar bundan narazılıq edir." 
Xeyrəddin Qoca BNA-nın ünvanına daha sərt sözlər səsləndirib. "Bunlar çox tərbiyəsiz və yekəbaş adamlardır. Rəhbərlik ortalıqda yoxdur. Mətbuat katibini salıblar ortalığa onda bütün günü gic-gic bəyanatlar yaymaqla məşğuldur. Mənim qızımın maşınının şəkilini çəkib mətbuata vermək cinayət tərkibli əməlidir. Çünki mülkiyyət toxunulmazlığı var."
Xeyrəddin Qoca deyir ki, BNA ləğv edilməlidir. Çünki insanları aldatmaqla məşğuldurlar. Ləğv olunmalıdır. Olunacaq da."
Oxşar xəbərlər