Putin İranı etibarlı və sabit tərəfdaş adlandırıb

  • 28 mart 2017, 20:47
Rusiya prezidenti Vladimir Putin iranlı həmkarı Həsən Ruhani ilə görüşündə sonuncu dəfə Bakıda keçirdikləri görüşü xatırladıb.

APA-nın Moskva müxbirinin xəbərinə görə, V. Putin H. Ruhaninin Moskvada görməkdən çox şad olduqlarını deyib: "Rusiya və İranı uzun illər bağlayır. Biz 500 ildən çoxdur ki, diplomatik münasibətlərə malikik. İran bizim mehriban qonşumuz və etibarlı, sabit tərəfdaşımızdır. Biz praktiki olaraq bütün istiqamətlərdə effektli əməkdaşlıq edirik. Bu, beynəlxalq fəaliyyət, çoxtərəfli çətin problemlərin həlli və iqtisadiyyat sahəsindəki işlərdir. Son illər bütün bu istiqamətlərdə önəmli nəticələr əldə edirik. Əminliklə demək olaraq ki, ötən il iki ölkə arasında ticarət dövriyyəsi 70 faiz artıb. Bu, müasir mürəkkəb iqtisadi şərtlərdə nadir hadisədir". 

Həsən Ruhani isə çıxışında Moskvada qonaq olmaqdan şad olduğunu söyləyib: "Bu, yeni ildə bizim ilk xarici səfərimizdir. Bu, bizim əməkdaşlığımızın inkişafını göstərir. Son üç il yarımda münasibətlərimiz addım-addım müsbət inkişaf edib. Mən arxaya baxan zaman hər son görüşümüzdən sonra bizim uğurlar əldə etdiyimizi görürəm. Münasibətlərimiz yeni mərhələyə qədəm qoyub. Bu yeni mərhələdə biz münasibətlərimizin yeni keyfiyyəti haqqında danışa bilərik. Ümid edirəm ki, bu səfər çərçivəsində əməkdaşlığımızın inkişafı üçün yeni addımlar atılacaq. Bizim son məqsədimiz regionda sülhün və sabitliyin möhkəmləndirilməsidir. Bizim münasibətlərimizin inkişafı üçüncü ölkəyə qarşı istiqamətlənməyib”.

Demokratik.Az

Oxşar xəbərlər